Вернуться к обычному виду

АҦсны ЖӘЛАР РЕИЗАРА – АПАРЛАМЕНТ

Аофициалтә саит

Жәлар реизара ашьақәгылашьа

Жәлар Реизара – Аҧсны Аҳәынҭқарра азакәанҧҵаратә усбарҭоуп. Палатак змоу парламентуп. Ишьақәгылоуп маӡала абжьыҭирала, азеиҧштәи, иеиҟароуи, ишиашоу имҩаҧысуа алхратә зини шьаҭас иҟаҵан иалххо 35 депутат рыла. Апарламент Аҧҟара инақәыршәаны Аҧсны Аҳәынҭқарра Апарламент Ахантәаҩи Ахаҭыҧуаҩцәеи алххоит адепутатцәа рхыҧхьаӡараҟнытә маӡалатәи бжьыҭирала Апарламент аҿҳәара инақәыршәаны. Адепутатцәа адепутаттә хәдықәҵаратә статус рымоуп. Аимперативтә мандатла ҧкра рымаӡам. Азинмчқәа, аҳасабтәқәа, ауснагӡатәқәа

Аҧсны Жәлар Реизара – Апараламент адепутат Аҧсны Аҳәынҭқарра Аконституциеи “Аҧсны Жәлар Реизара – Апараламент адепутатцәа ралхразы” Аҧсны Аҳәынҭқарра Аконституциатә закәани инарықәыршәаны ажәлар дырхаҭарнакны далххоит Аҧсны Жәлар Реизара – Апарламент аҟны Аҧсны Аҳәынҭқарра Аконституциеи “Аҧсны Жәлар Реизара – Апараламент адепутат истатус азы” Азакәани рыҟны иазгәаҭоу азакәанҧҵаратәи егьырҭ азинмчқәеи рынагӡаразы.

Аҧсны Аҳәынҭқарра азакәанҧҵара инақәыршәаны Аҧсны Жәлар Реизара – Апараламент инанагӡоит абарҭ азинмчқәа:

1. Аҧсны Аҳәынҭқарра Аконституциеи азакәанқәеи аднакылоит;

2. административтә-дгьылҵакыратә еиҭакрақәа рзы азыӡбақәа аднакылоит:

3. атәылаҿы иҟоу аҭагылазаашьеи, аҳәынҭқарра аҩныҵҟатәи адәныҟатәи политика ахырхарҭақәеи урҭ рынагӡареи иазку Аҧсны Аҳәынҭқарра Ахада иаацҳамҭа иазыӡырҩуеит.

4. аҳәынҭқарратә биуџьет иахәаҧшуеит иагьшьақәнарҕәҕәоит, уи анагӡашьагьы хылаҧшра анаҭоит;

5. ашьауҕатә, ашьауҕатәи-апроцессуалтәи, ариашаратә-џьатә, атәылауаҩратә, атәылауаҩратә - процессуалтә, арбитражтәи даҽа закәанҧҵараки, аӡбареиҿкаареи апрокуратуреи рызҵаарақәа ирызку азакәани аднакылоит;

6. Аҧсны Аҳәынҭқарра Аконституциеи азакәанқәеи реилкааҭара алнаршоит;

7. Аҧсны Аҳәынҭқарра аҳәынҭқарратә ҳамҭақәеи, аҳаҭыртәи арратәи хьӡқәеи шьақәнаргылоит;

8. Аҧсны Аҳәынҭқарра аҳәынҭқаррабжьаратә еиқәшаҳаҭрақәа шьақәнарҕәҕәоит иагьҧырнахуеит;

9. Аҧсны Жәлар Реизара Ахантәаҩи уи ихаҭыҧуаҩцәеи алнахуеит;

10. Аҧсны Аҳәынҭқарра Ахада амаҵура иаиҭоит рыхгьы иақәиҭитәуеит:

- Аҧсны Аҳәынҭқарра Амилаҭтә банк Ахантәаҩы;

- Аҧсны Аҳәынҭқарра аӡбаҩцәа;

- Аҧсны Аҳәынҭқарра апрокурор Хадеи ихаҭыҧуаҩцәеи;

11. рмаҵура иаиҭоит рыхгьы иақәиҭитәуеит Аҧсны Аҳәынҭқарра Агәаҭаратә палата адуиторцәа хҩык;

12. Аҧсны Аҳәынҭқарра Аминистрцәа Реилазаара хазы игоу алахәылаҩцәақәак рыгәрамгара авотум алаҳәаразы азыӡба идикылоит;

13. Аҧсны Аҳәынҭқарра Ахада имаҵура иамхразы ахараидҵара рыланаҳәоит;

14. амнистиа рыланаҳәоит;

15. аибашьреи аҭынчра абжьаҵареи ирыдҳәалоу азҵаарақәа аӡбоит;

16. Аҧсны Жәлар Реизара адепутатцәа рықәнага иадҳәалоу азҵаарақәа аӡбоит;

17. Аҷыдалкаатәи арратә ҭагылазаашьеи ралагалара азин азы аӡыӡбақәа аднакылоит;

18. Аҧсны Аҳәынҭқарра азакәанқәеи Аконституциеи ирыднаҵо азинмчқәа нанагӡоит.