Аҧсны Аҳәынҭқарреи Урыстәылатәи Афедерациеи рхадацәа рнапы зҵарҩыз “Аиҩызареи астратегиатә усеицуразеи рзы Аиқәшаҳаҭра” инамаданы ицәырҵыз азҵаарақәа жәпакы. Р. Ҳаџьымба иазгәеиҭеит анапы зҵаҩыз адокумент аҧхьатәи авариант аҧсуа уаажәларраҿы иеиуеиҧшым агәаанагарақәа шцәырнагаз, насгьы ауаажәларраҟнытә Аиқәшаҳаҭра ахәҭаҷқәак рыҧсахразы иҟаҵаз ажәалагалақәа адокумент аредакциа азураан хырҩа шрыҭаз, иара убас иҳәеит аринахысгьы аҧсны жәлари Аҧсны Аҳәынҭқарреи рзы аҵак ду змоу адокументқәа ауаажәларра алархәны, иаартны ахцәажәара шымҩаҧысло, Аиқәшаҳаҭра анапаҵаҩра ашьҭахь Аҧсны иазоужьхо аматериалтә цхыраара аиҳарак аекономика ашьҭыхра ишазкхо.
Аҳәынҭқарра Ахада иқәгылара ашьҭахь рҭак ҟаиҵеит аизара иалахәыз адепутатцәа Гал араион аҿы инхо ауааҧсыра рзинтә ҭагылазаашьа, аихамҩатә кредити иара аихамҩа амҩанысреи, афымцамчи афымцамҩангареи, анапы зҵаҩу Аиқәшаҳаҭра инақәыршәаны Урыстәыла азинхьчаратә усбарҭақәа аус рыцура, Аҧсны Аҳәынҭқарра аҳәаа, ауалафахәи атәанчахәи уҳәа ирыдҳәаланы ицәырыргаз азҵаарақәа маҷымкәа.
Иқәгылара хыркәшо, Р. Ҳаџьымба иҳәеит, иахьазы акрызҵазкуа уснагӡатәны аҳәынҭқарра аҿаҧхьа ишықәгылоу Урыстәылеи Аҧсни русбарҭабжьаратәи реиҳабырабжьаратәи еизыҟазашьаақәа рышьақәыргылара, ицәырҵуа азҵаарақәа зегьы рыӡбара ажәлари аҳәынҭқарраргылареи рус иахәартә ишазнеитәу.