Аҧсны Аҳәынҭқарра Аконституциа 20 шықәса ахыҵра Аҧсны Жәлар Реизара Ахантәаҩы Валери Бганба идиныҳәалеит Алада Уаҧстәыла Апарламент ахьӡала Уаҧстәыла Ареспублика Апарламент Ахантәаҩы актәи ихаҭыҧуаҩ Инал Мамиев.

Адныҳәалараҿы иазгәаҭоуп: “

Ҳаҭыр зқәу Валери Рамшьыхә-иҧа!

Уаҧстәыла Ареспублика Апарламент ахьӡала, хаҭала сара сыхьӡала, Шәаргьы, аҧсны жәлар зегьы ишәыдысныҳәалоит аҳәынҭқарратә ныҳәа - Аҧсны Аҳәынҭқарра Аконституциа Амш. Ноиабр 26, 1994 шықәса – аҧсны жәлар зегьы рзы ҷыдала аҵакы змоу рыцхәуп. Атәыла аҭагылазаашьа аныуадаҩӡаз, адәныҟатәи ашәарҭара, аекономикатә блокада, аибашьрашьҭахьтәи аилаҳара аныҟаз, Аконституциа адкылара иара аҧсҭазаара иаҭахны иҟалеит. Аконституциа атәыла азинтә, аполитикатә еиҿкааразы шьаҭас иамоу Ихадоу Закәанны иҟоуп. Шәара шәтәыла акрызҵазкуа ауаажәларратә-политикатә хҭысқәа зегьы аконституциатә нормақәа ирықәыршәаны имҩаҧысуеит, уи, ҳәарада, иара жәларбжьаратәи ахьӡ ашьақәырҕәҕәара иацхраауеит.

Ҳара ҳажәларқәа ирыбжьоу аиҩызареи аиашьареи рыла иузеиҟәымҭхо иеибаркуп, ҳаҧхьаҟа агәрагареи, аҳаҭыреиқәҵареи, аилибакаареи шьаҭас измоу ҳҳәынҭқаррабжьаратә еизыҟазаашьақәа рырҕәҕәареи реизҳареи агәра ҳгоит”.

Инал Мамиев иҟаиҵаз адныҳәалараҿы аҧсуа жәлар ирзеиҕьаишьеит аҭынчра, аизҳазыҕьара.