Урыстәылатәи Афедерациа Аконституциа рыдыркылеижьҭеи 21 шықәса аҵра инамаданы Аҧсны Жәлар Реизара Ахантәаҩы Валери Бганба Аҧсны Жәлар Реизара ахьӡала Урыстәылатәи Афедерациа Афедералтә Еизара анапхгара ашҟа адныҳәалара дәықәиҵеит.

Урыстәылатәи Афедерациа Афедералтә Еизара Ахеилак Ахантәаҩы Валентина Матвиенкои Урыстәылатәи Афедерациа Афедералтә Еизара Аҳәынҭқарратә Дума Ахантәаҩы Сергеи Нарышкини рыхьӡала идәықәҵаз адныҳәалараҿы иҳәоуп:

“1993 шықәса декабр 12 рзы ирыдыркылаз Урыстәылатәи Афедерациа Аконституциа Урыстәылатәи аҳәынҭқарратәра ахьыҧшымреи уи еицакра зқәым адемократиатә ҵаки шьақәнарҕәҕәеит, иазгәанаҭеит ауаҩытәҩсеи уи изинқәеи ихақәиҭрақәеи зыхә ҳаракӡоу ак еиҧш. Урыстәылатәи Афедерациа азакәан хада иахьатәи Урыстәылатәи аҳәынҭқарра аҿиара астратегиеи уи жәларбжьаратәи аҳаҭыри ашьақәырҕәҕәара шьаҭас ирымоуп.

Аҧсни Урыстәылеи рыжәларқәа реизыҟазаашьақәа традициала аиҩызареи агәреибагареи, аҳаҭыреиқәҵареи рыла иеиҿкаауп. Ҷыдала иазгәаҳҭар ҳҭахуп аҧхьаҟагьы наҟ-ааҟгьы гәҭакыс иҳамоу ҳастратегиатә усеицура арҵаулара. Уи Аҧсны Аҳәынҭқарра аладатәи аҳәаақәа ршәарҭадареи Кавказ зегьы аҭышәынтәылареи алзыршо крызҵазкуа факторны иҟоуп.

Агәра ҳгоит апарламентбжьаратә диалог аҿиара ацҵареи уаанӡа иеицазгәаҭаз апланқәа рынагӡареи аринахысгьы ҳажәларқәа ринтересқәа инарықәыршәаны ҩ-ганктәи ҳусеицура ишацхраауа.