Аҧсны Аҳәынҭқарра Ахада Аҧсны Жәлар Реизара ахәаҧшырц азы иқәиргылеит Беслан Бараҭелиа икандидатура Аҧсны Аҳәынҭқарра Амилаҭтә банк Ахантәаҩы имаҵураҿы иаҭаразы.

Абри инамаданы, имҩаҧысит абиуџьети, акредиттә еиҿкаарақәеи, ашәахтәқәеи, афинансқәеи рзы Аҧсны Жәлар Реизара Аилак аилатәара. Арахь дааҧхьан Аҧсны Аҳәынҭқарра Амилаҭтә банк Ахантәаҩы имаҵурахьы акандидат Беслан Бараҭелиа.

Аилатәара мҩаҧигеит абиуџьети, акредиттә еиҿкаарақәеи, ашәахтәқәеи, афинансқәеи рзы Аҧсны Жәлар Реизара Аилак ахантәаҩы Гьаргь Агрба. Уи иалахәын Аҧсны Жәлар Реизара Ахантәаҩы Валери Бганба, ахантәаҩы ихаҭыҧуаҩцәа Оҭар Ҵәыџьба, Вагаршак Косиан, адепутатцәа: Гәурам Барганџьиа, Валери Агрба, Левон Галустиан, Анзор Кокосқьериа иара убас Апарламент аҟны Аҧсны Аҳәынҭқарра Ахада ихаҭарнакс иҟоу Дмитри Шамба. Иарбоу азҵаара ахәаҧшраан Беслан Бараҭелиа адепутатцәа рызҵаарақәа жәпакы рҭакқәа ҟаиҵеит.

Аилак аилатәара хыркәшо, иӡбан, ааигәа имҩаҧысраны иҟоу Аҧсны Жәлар Реизара асессиа аилатәараҟны Аҧсны Аҳәынҭқарра Амилаҭтә банк Ахантәаҩы имаҵура иаҭаразы Беслан Бараҭелиа икандидатура ахәаҧшразы ирыдгалатәуп ҳәа.