Ашықәс Ҿыц аламҭалазы Аҧсны жәлар Реизара Ахантәаҩы Валери Бганба Аҧсны Жәлар Реизара ахьӡала Урыстәылатәи Афедерациа анапхгара рышҟа адныҳәаларақәа дәықәиҵеит.
Афедерациа Ахеилак Ахантәаҩы Валентина Матвиенкои Аҳәынҭқарратә Дума Ахантәаҩы Сергеи Нарышкини ирзынархаз адныҳәаларақәа рҿы иҭабуп ҳәа раиҳәеит ганрацәалатәи аҧсуа-аурыстә еизыҟазаашьақәа рыҿиара азҵаарақәа рҿы иҟарҵо адгыларазы.
“Ҳгәыҕуеит Аҧсни Урыстәылеи рыжәларқәа реизҳазыҕьара иазку ҳусеицура Кавказ зегьы аҭышәынтәалареи аҭынчреи рырҕәҕәара ишазкхо”, - аҳәоит Аҧсны Жәлар Реизара Ахантәаҩы иҟаиҵаз ашықәсҿыцазтәи адныҳәалараҿы.
Валери Бганба дрыдныҳәалеит иара убас Урыстәылатәи Афедерациа Афедералтә Еизара Афедерациа Ахеилаки Аҧсны Жәлар Реизареи русеицуразы Акомиссиа ацхантәаҩы, атәылахьчареи ашәарҭадареи рзы Афедерациа Ахеилак Аилак ахантәаҩы Виктора Озеров, Аҧсны Жәлар Реизара амадаразы адепутаттә гәыҧ анапхгаҩы, атәылауаҩратә, ашьауҕатә, арбитражтә, апроцессуалтә закәанҧҵаразы Аҳәынҭқарратә Дума Аилак ахантәаҩы ихаҭыҧуаҩ Александр Ремезков, Ихьыҧшым Аҳәынҭқаррақәа Реиҩызара аусқәа, евразиатәи аинтеграциеи аџьынџьуаа рымадарази Аилак ахантәаҩы Леонид Слуцкои, Аҧсны иҟоу Урыстәылатәи Афедерациа Азиннаӡазмоу Ацҳаражәҳәаҩ Семион Григориев.
Валери Бганба Аҳәынҭқарратә Дума адепутатцәа, Урыстәылатәи Афедерациа Афедералтә Еизара Афедерациа Ахеилак алахәылаҩцәа, Аҧсны иҟоу Урыстәылатәи Афедерациа Ацҳаражәҳәара аколлектив, Урыстәыла жәлар зегьы ирзеиҕьаишьеит анасыҧ, аманшәалара,аизҳазыҕьара.