Имҩаҧысит Аҧсны адепутатцәа изаамҭанытәиу есымчыбжьатәи аилацәажәара. Аилацәажәара мҩаҧигеит Аҧсны Жәлар Реизара Аиҳабы Валери Бганба.

Аилацәажәараҿы ахҳәа азуун Апарламент абжьааҧнытәи аусура, хырҩа рыҭан хара имгакәа Аҧсны Жәлар Реизараҿы иахәаҧшразы иазырхиатәту азакәанапроектқәа жәпакы. Уахь иаҵанакуеит аҧхьатәи аҧхьараан ирыдкылаз азакәанапроектқәа “Апривтизациазы”, “Алицензиазуразы”.

Абри аилацәажәараҿы Шамба Сергеи Мирон-иҧа дрылаҵан азинтә политикеи, аҳәынҭқарратә ргылареи, ауаҩы изинқәеи рзы Аҧсны Жәлар Реизара Аилак аилазаареи жәларбжьаратәи, апарламентбжьаратәи еимадарақәеи аџьынџьуаа рымадарақәеи рзы Аҧсны Жәлар Реизара Аилак аилазаареи.

Аекономикатә политикеи, ареформақәеи, аҿыцлагалақәеи рзы Аҧсны Жәлар Реизара Аилак аилазаареи жәларбжьаратәи, апарламентбжьаратәи еимадарақәеи, аџьынџьуаа рымадарақәеи рзы Аҧсны Жәлар Реизара Аилак аилазаареи далаҵан Арӡынба Таифун Наим-иҧа.

Адепутат Гагәылиа Ҭемыр Лиосик-иҧа далаҵан атәылахьчареи амилаҭтә шәарҭадареи рзы Аҧсны Жәлар Реизара Аилак аилазаареи аҵараиуреи, аҭҵаарадырреи, акультуреи, адини, аҿар русқәеи аспорти рзы Аҧсны Жәлар Реизара Аилак аилазаареи.