Апарламент аҿы имҩаҧысит абиуџьети, акредиттә еиҿкаарақәеи, ашәахтәқәеи, афинансқәеи рзы Аилак инарҭбаау аилатәара. Аилатәара иалахәыз аминистррақәеи аусбарҭақәеи рхадацәа ахцәажәара иалагеит 2015 шықәсазтәи аҳәынҭқарратә биуџьет.

Афинансқәа рминистр Амра Қәаранӡиа ирылалҳәеит абиуџьет аҧҟара ҿыцқәа инарықәыршәаны ишышьақәыргылоу. Абиуџьет аҧҟара ҿыцқәа шьақәыргылоуп ажьырныҳәа 1, 2015 шықәсазы амч зауз абиуџьет ашьақәыргыларазы азакәан инақәыршәаны. Апарламент ахәаҧшразы иадгалан аҳәынҭқарратә биуџьет азакәан апроект. Аҳәынҭқарратә биуџьет азеиҧш мҽхакы – ахашәалахәқәа рыла 11 757 537, 9 артәоит, аныхтәқәагьы реицҵалыҵ - 11 998 061, 1. Абиуџьет амҽах дефицитны иҟоуп - 240 523, 2. Аҳәынҭқарратә биуџьет азы ҟазшьарбага хадақәаны иҟоуп - 101 15 812,2, аныхтәқәа рыла -959 3335,4.

«Абиуџьет асоциалтә хырхарҭоуп иамоу. Раҧхьа иргыланы иӡбатәны иҳамаз – ауалафахәқәа рышьҭыхра акәын, аусура зегьы абри ахырхарҭала имҩаҧган. Аҩбатәи азҵаара – асоциалтә ҟәша - агәабзиарахьчареи аҵараиуреи реиқәыршәара акәын», - лҳәеит Қәаранӡиа.

Аилак иаӡбеит абиуџьет актәи аҧхьараан адкыларазы Апарламент иадгалатәуп ҳәа.

Аилак иара убас иахцәажәеит апарламент аҵыхәтәантәи асессиаҿы актәи аҧхьараан ирыдыркылаз «Аҧсны Аҳәынҭқарра абиуџьеттә шьақәгылара ашьаҭақәа рзы» азакәанапроект.