<p.Абиуџьети, акредит еиҿкаарақәеи, ашәахтәқәеи, афинансқәеи рзы Аилак инарҭбаау аилатәара мҩаҧысит
<p>Аилатәараҿы ирыхәаҧшын Аҧсны Ахада Р. Ҳаџьымба Аҧсны Жәлар Реизара иадигылаз азакәанпроектқәа жәпакы.
<p>Аилатәара мҩаҧигеит Аилак ахантәаҩы Гаргь Агрба. Уи иалахәын адепутатцәа: Беслан Ҵнариа, Валери Агрба, Гәурам Барганџьиа, Саид Ҳаразиа, Дмитри Гәынба, Аполлон Гәыргәлиа, Оҭар Ҵәыџьба и Леонид Чамагәуа,  Апарламент аҿы Аҧсны Ахада ихаҭарнак Дмитри Шамба.
<p>Адепутатцәа аилатәараҿы ирыхәаҧшит Аҧсны аҳәынҭқарра ибиуџьеттәуи ибуџьеттәыми афондқәа русура иадҳәалаз азакәан апроектқәа: «Аҧсны Аҳәынҭқарра ихымҧадатәу амедицинатә ҧгаҧсатә Фонд 2015 шықәсазтәи абиуџьет азы»;«Аҧсны Аҳәынҭқарра асоциалтә ҧгаҧсеи аџьа ахьчарази Афонд 2015 шықәсазтәи абиуџьет азы»; «Аҧсадгьыл ахь архынҳәразы Аҧсны Аҳәынҭқарра Афонд 2015 шықәсазтәи абиуџьет азы»; «Аҧсны Аҳәынҭқарра Амҩатә фонд 2015 шықәсазтәи абиуџьет азы»; «1992-1993 ш.ш. Аҧсны Аџьынтәылатә еибашьра аинвалидцәа ибиуџьеттәым Рфонд  2015 шықәсазтәи абиуџьет азы»; «Аҧсны Аҳәынҭқарра Атәанчаратә Фонд 2015 шықәсазтәи  абиуџьет азы». Урҭ ықәдыргылеит афондқәа рхантәаҩцәа: ихымҧадатәу амедицинатә ҧгаҧсатә Фонд ахантәаҩы В.Ажьиҧҳа, асоциалтә ҧгаҧсеи аџьа ахьчарази Афонд ахантәаҩы З. Малиа, Аҧсадгьыл ахь архынҳәразы Аҧсны Аҳәынҭқарра Афонд аиҳабы инапынҵақәа назыгӡо Џь. Смыр, 1992-1993 ш.ш. Аҧсны Аџьынтәылатә еибашьра аинвалидцәа ибиуџьеттәым Рфонд ахантәаҩы Р. Аџьба.
<p>Азакәанапроектқәа ианрылацәажәоз адепутатцәа инарҭбааны иҭырҵааит 2015 шықәсазы финансла зеиқәыршәара азгәаҭоу афондқәа русура, хықәкылатәи рыпрограммақәеи рхырхарҭақәеи. Аилатәара иалахәыз иазгәарҭеит ибиуџьеттәым афондқәа русура аанызкыло уадаҩраны ишыҟоу анаплакқәа руалқәхара дуқәа. Абри инадҳәаланы, адепутатцәа ахантәаҩцәа ирыдырҵеит ауал зқәу рсиа апарламент аҿы иқәдыргыларц, иара убас иазгәарҭеит хара имгакәа, Аҳәынҭқарратә шәахьтә маҵзура ахаҭарнакцәа рҧылара гәҭакыс ишрымоу. Ауалқәа раҧыхра, иаҳҳәап, асоциалтә ҧгаҧсеи аџьа ахьчарази Афонд ахәыҷқәа аҧхынтәи рыҧсшьареи Аҧсны атәылауаа рсанатортә-курорттә хәышәтәреи реиҿкаарахьы аҧаратә хархәагақәа рдәықәҵара алнаршоит.
<p>Атәанчаратә Фонд ахантәаҩы иазгәаиҭеит сынтәа аџьатәи асоциалтәи тәанчахәқәа ишрыцло. Абри апроект иахәаҧшны адепутатцәа ирҳәеит ҷыдала аиаҭымцәеи, 1992-1993 ш.ш. Аҧсны Аџьынтәылатә еибашьраҿы иҭахаз рҭаацәеи хылаҧшра шрыҭатәу. Хыхь иазгәаҭоу азакәанапроектқәа рылацәажәараан Аилак иаӡбеит урҭ ааигәа имҩаҧысраны иҟоу апарламент асессиа аилатәараҿы актәи аҧхьараан рыдкыларазы ирыднагаларц  «Аҧсны аҳәынҭқарратәи амчқәа иреиҳаӡоу аусбарҭақәа реилазаараҟни Аҧсны Аҳәынҭқарра аҭыҧантәи ахаланапхгаратә усбарҭақәеи рыҟны аџьа ахәшәараҿы амаҵура ақәнагахара иазку» Аҧсны аҳәынҭқарра Азакәан апроекти «Акцизқәа рзы» Аҧсны Аҳәынҭқарра Азакәан аҧсахра алагаларазы» Аҧсны Аҳәынҭқарра Азакәан апроекти.
<p>«Аҧсны аҳәынҭқарратәи амчқәа иреиҳаӡоу аусбарҭақәа реилазаараҟни Аҧсны Аҳәынҭқарра аҭыҧантәи ахаланапхгаратә усбарҭақәеи рыҟны аџьа ахәшәараҿы амаҵура ақәнагахара иазку» Аҧсны аҳәынҭқарра Азакәан апроект Аҧсны аҳәынҭқарратәи амчқәа иреиҳаӡоу аусбарҭақәа реилазаараҟни Аҧсны Аҳәынҭқарра аҭыҧантәи ахаланапхгаратә усбарҭақәеи рыҟны ауалафахәы ашәагаа ашьҭыхрахьы идәықәҵоуп. Уи азырхиоуп аҳәынҭқарратә маҵзуҩцәа руалафахәы ашьҭыхразы 2015 шықәсазы Аҧсны Аҳәынҭқарра  асоциалтә политика анагӡаразы иазгәаҭаз анормативтә зинтә ҳәаақәҵара хықәкыс иҟаҵаны. Иазгәаҭатәуп, Аҧсны Аҳәынҭқарраҿы аамҭа-аамҭала хазы игоу абиуџьеттә ҟәша иаҵанакуа аусзуҩцәа руалафахәы ашьҭыхра шымҩаҧыргалоз, аха 20011 шықәсазы Аҧсны аҳәынҭқарратәи амчқәа иреиҳаӡоу аусбарҭақәа реилазаараҟни Аҧсны Аҳәынҭқарра аҭыҧантәи ахаланапхгаратә усбарҭақәеи рыҟны аџьа ахәшәараҿы амаҵура ақәнагахара шьақәзыргыло Азакәан шыҧсахмыз.
<p>«Акцизқәа рзы» Аҧсны Аҳәынҭқарра Азакәан аҧсахра алагаларазы» Аҧсны Аҳәынҭқарра Азакәан апроект иазгәанаҭоит импортра зуа атауар “ауараш” акатегориеи «аҭыҭын аалыҵқәа» акатегориеи ракцизқәа разыҧҵәақәа рышьҭыхра. Иарбоу азакәанапроект аилыркаатә шәҟәаҿы иҳәоуп ари ауснагӡатә мзызс ишамоу адәныҟаеконмикатә усзура аҟнытә имааиз ахашәалахәқәа рхарҭәаара, ажьырныҳәа 1, 2015 шықәсазы Аҧсны Аҳәынҭқарреи Урыстәылатәи Афедерациеи реиҳабыра рыбжьара ахәаахәҭразы Аиқәшаҳаҭра аусура иахьалагаз инадҳәаланы. Ари азҵаара ианалацәажәоз адепутатцәа ирыӡбеит аҧхьаҟа Аҧсны Аҳәынҭқарраҿы абас еиҧш атауар хкы аазрыхуа анаплакы ахаҭарнакцәа аарыҧхьарц уи алацәажәаразы.