Жәлар Реизара Аиҳабы Валери Бганба Чечентәыла Ареспублика Апарламент Аиҳабы актәи ихаҭыҧуаҩ Салман Закриев ихьӡала Чечентәыла Ареспублика Апарламент Аиҳабы Дукувахи Баштаи-иҧа Абдурахманов иҧсра инамаданы адышшыларатә шәҟәы дәықәиҵеит.

Адышшыларатә шәҟы аҟны иҳәоуп:

«Ҳаҭыр зқәу Салман Соип-иҧа!

Аҧсны Аҳәынҭқарраҿы гәалсрала ирыдыркылеит Чечентәыла Ареспублика Апарламент Аиҳабы Дукувахи Баштаи-иҧа Абдурахманов иаамҭаӡамкәа иҧсҭазара иалҵра.

Иҳауз ацәыӡ ду инамаданы ҳрыдышшылоит, ргәырҩа рыцеиҩаҳшоит Дукувахи Баштаи-иҧа иуацәеи иҭынхацәеи, иҩызцәеи иколлегацәеи.

Аҧсны ҩызара азызуаз Дукуваху Баштаи-иҧа ара ибзианы дырдыруан ачечен жәлар рыҩныҵҟа зыҧсадгьыл иапатриот иашаз, ҳаҭыр ду зқәыз иреиуаз аӡәы иаҳасабала.

Дукуваху Баштаи-иҧа дыздыруаз ҳаҭыр иқәырҵон иара игәаҕьреи, иҟазшьа аҕәҕәареи аартреи ирыцыз ауаҩра, аҧхарразы, гәык-ҧсыкала изааигәаз,иҩызцәа ианакәзаалак ириҭоз ацхырааразы.

Иҧсаҭа бзиахааит, игәалашәара лаша ҳацзаауеит ахааназы Дукувахе Баштаи-иҧа Абдурахманов».