Жәлар Реизара Аиҳабы Валери Бганбеи Атәылахьчареи амилаҭтә шәарҭадареи рзы Жәлар Реизара Аилак ахантәаҩы Фазлыбеи Аҩыӡбеи иахьа Грозныи инеит зыҧсҭазаара иалҵыз Чечентәыла Ареспублика Апарламент Аиҳабы Дукувахи Абдурахманов иуацәеи иҭынхацәеи рыдышшыларазы.

Чечентәыла Ареспубликаҟны ари амш ЧА Апарламент Аиҳабы Дукувахи Абдурахманов иҧсҭазаара иалҵра инамаданы лахьеиқәра мышны ирылаҳәоуп. Дукувахе Баштаи-иҧа дшыҧсыз ала ашәаџьҳәара рылаҳәан рашәарамза 29 рзы. Иацы иара иқыҭа Гәудерместәи араион Џалка ақыҭан анышә дамадан.

Чечентәыла Ареспублика Ахада Рамзан Кадыров Чечентәыла Ареспублика Апарламент Аиҳабы Дукувахи Абдурахманов иҧсыжра далахәын.

Д. Абдурахманов инарцәымҩахь инаскьагаразы Грозныи ақ. иара убас инеит Даҕьысҭан Ареспублика Ахада Рамазан Абдулатипов, УА Аҳәынҭқарратә Думы адепутат Адам Делимханов, Чечентәыла Ареспублика Аусбарҭа Ахада, Чечентәыла Ареспублика Аиҳабыра анапхгаҩы Магомед Даудови егьырҭ аофициалтә хаҿқәеи, ареспубликаҟны инхо шәҩыла ауааҧсыреи.

Р. Кадыров иазгәеиҭеит, Д. Абдурахманов акыраамҭа хаҵарала ачымазаара хьанҭа дшаҿагылаз, аҧҟара ҕәҕәақәа шихигаз.

«Дукуваха Баштаи-иҧа аҵыхәтәантәи амшқәа рҟынӡа ареспублика аҧсҭазаара активла далахәын. Уи Чечентәыла Ареспублика актәи Ахада, Урыстәыла афырхаҵа ҳәа ахьӡ зыхҵоу Аҳмаҭ-Ҳаџьы Кадыров дидгыланы аус ицызуаз патриот иашаны дыҟан. Д. Абдурахманов хьаҵрак ҟамҵакәа Чечентәылеи Урыстәыла зегьи ридеологиатә аҕацәа дырҿагылан. Уи ибзианы дырдыруан ҳаҭыргьы иқәырҵон аполитикцәа, атәыла ауаажәларратә усзуҩцәа», – иҳәеит иара.

Ареспублики Ахада иҳәеит иара убас Д. Абдурахманов Аҩадатәи Кавказ ажәларқәа реидкылареи арегионқәа рыбжьара аимадара арҕәҕәареи рзы иҟаиҵаз шмаҷым.

«Ахә ашьара уадаҩуп Д. Абдурахманов Чечентәыла Ареспублика Апарламент актәи хантәаҩны даныҟаз уи ашьақәгылараҟны илагаламҭа. Дукуваха Баштаи-иҧа игәалашәара лаша ахааназ рыгәқәа рыҟны иаанхоит Чечентәыла Ареспублика ауааҧсыра. Сара гәык-ҧсыкала срыдышшылоит Дукувахи Баштаи-иҧа иуацәеи иҭынхацәеи, ачечен жәлар зегьы! Зегьиреиҳау Аллаҳ дрыцҳаишьааит!” - иҳәеит Р. Кадыров.

Дукувахи Абдурахманов иҧсҭазаара иалҵра инадҳәаланы адышшылара ҟарҵеит Афедерациа Ахеилак ахантәаҩы Валентина Матвиенко, УА Ахада ицхырааҩ Владислав Сурков, Ҟарачы-Череқьестәыла Ахада Рашид Темрезов уҳәа уб.егь.

Иацы Чечентәыла Ареспублика ашҟа адышшылара шәҟәы дәықәиҵеит Аҧсны Жәлар Реизара Аиҳабы Валери Бганба.

Чечентәыла Ареспублика Апарламент Аиҳабы Дукувахи Абдурахманов иҧсҭазаара иалҵра инамаданы иара убас адышшылара ҟаиҵеит Аҧсны Жәлар Реизара III, IV ааҧхьара (2002 – 2012 шш..) Аиҳабы Н. Ашәба. .