НОВОСТИ

Ахадеи  Жәлар Реизара адепутатцәеи реиҧылара
07.09.2015
Поделиться в соцсетях:

Ахадеи Жәлар Реизара адепутатцәеи реиҧылара

Аҟәа, 11.00

Ахада Рауль Ҳаџьымба Жәлар Реизара адепутатцәа дырҧылеит аҧхынтәи рыҧсшьарамшқәа рышьҭахь актәи амш азы.

Ахада еиҭа иазгәеиҭеит аиҳабыра амчқәа рымахәҭақәа еиқәшәаны русура шаҭаху атәы. «Агәаанагарақәа реиҧшымзаара сара сацәшәаӡом, аха ҳаидызкыло ыҟазароуп», - иҳәеит аҳәынҭқарра Ахада.

Жәлар Реизара Аиҳабы Валери Бганба дырзааҭгылеит иааиуа ашықәс азы Апарламент аҿаҧхьа иқәгылоу азҵаарақәа, убрахь иналаҵаны 2014 шықәса абҵара 24 азтәи Аиқәшаҳаҭра иацҵаны аизыразрақәа ирыдҳәалоу аусура атәы.

Атуристтә аамҭа аихшьалақәа ҟаҵо, Ахада иазгәеиҭеит атуристцәа рхыҧхьаӡара акырӡа ишеизҳаз. "Ҳара урҭ рхыҧхьаӡара ҽааны иҵегьы иазҳауеит ҳәа ҳгәы иаанагоит, иааиуа ашықәсазтәи акурорттә аамҭа ибзиаӡаны ҳҽазыҟаҳҵароуп, ҷыдала аинфраструктура аҿиара аганахьала ", - иҳәеит Рауль Ҳаџьымба.

Рауль Ҳаџьымба адепутатцәа ирзеиҭеиҳәеит ааигәа имҩаҧысыз Краснодартәи атәылаҿацә агәубернатор Вениамин Кондратиев иареи реиҿцәажәара атәы.

Ахада дахцәажәеит Гагра араион аҟны Краснодартәи атәылаҿацә ахаҭарнакра аркра азҵаара, уи Аҧсны аназхаҵамыз аамҭазы афункциақәа шананагӡаз, аха Урыстәылеи Аҧсни официалла адипломатиатә еизыҟазаашьақәа анрыбжьарҵа ашьҭахь иара азинмчы Аҧсны иҟоу Урыстәыла ацҳаражәҳәара ашҟа ишиасыз.

Ахада ирылеиҳәеит 2016 шықәсазтәи абиуџьет аусуратә проект, шамахамзар, ишхиоу, уи абиуџьети, акредиттә еиҿкаарақәеи, ашәахтәқәеи, афинансқәеи рзы Аилак аҟны ишцәыргахо. Абиуџьет 2016 ш. ахатәы хашәала ишартәаракәу 5,7 млрд мааҭ. 500 млн инарзынаҧшуа абизнес маҷ аҿиара, ақыҭанхамҩа, атуризм ишазкхо. Уи еиҭа иазгәеиҭеит ареспубликатә биуџьет ашҟа ахашәала ахыҵхырҭақәа ирыцҵаны рыҧшаара аҭахны ишыҟоу, аҩныҵҟатәи алшарақәа хархәара шрыҭатәу.

Рауль Ҳаџьымба иара убас атәыла аҩныҵҟатәи адәныҟатәи аполитика иазкыз иактуалтәу апроблемақәа ирыдҳәалаз адепутатцәа рызҵаарақәа рҭак ҟаиҵеит.