Ҳаҭыр зқәу Аҧсуаҭҵааратә институт аусзуҩцәа зегьы, ҳаҭыр зқәу Уасил Шамуниа – иҧа!

Гәык-ҧсыкала ишәыдысныҳәалоит 90-шықәстәи аҭҵаарадырратә усура ду аиубилеи! Д. И. Гәлиа ихьӡ зху Аҧсуаҭҵааратә институт анаҧҵаз инаркны иахьа уажәраанӡа аҧсуа бызшәеи, алитературеи, афольклори, аҭоурыхи, археологиеи, аетнографиеи, аҟазареи, аекономикеи рызҵаарақәа аус рыдулара ахьымҩаҧысуа Аҧсны амилаҭтә ҭҵаарадырратә, акультуратә мчқәа еидызкыло центр хаданы, иналукааша гуманитартә ҭҵаарадырратә усбарҭаны иҟоуп.

Имариам аинститут знысыз амҩа. Избан акәзар еиҟәыгашьа амамкәа иеидҳәалан Аҧсуа ҳәынҭқарра аҭоурыхи аинститут аҭоурыхи, иакын урҭ рлахьынҵа.

Ҳаҧсадгьыл азы иаҳа ианыуадаҩыз аамҭақәа рзы, алахьынҵа аӡбара анымҩаҧысуаз аҧсуа жәлар рҭоурыхи ркультуреи рыҭҵаара аус ианаваргыланы, аинститут аусзуҩцәа есқьынгьы амилаҭтә зҵаара згәы иҵхоз, уи аӡбара знапы ианыз рыгәҭа игылан. Убас, 1992-1993 шш. амилаҭтә хақәиҭратә қәҧара ҧхьагылара азиуеит Аҧсуаҭҵааратә институт аҵарауаҩ, аҧсуа ҭоурыхтә ҭҵаарадырра ашьаҭаркҩцәа ируаӡәкыз В.Г. Арӡынба.

Аҧсуаҭҵааратә институт инанагӡо аҭҵаарадырратә роль, аҧсуа ҳәынҭқарразы иамоу аҵакы еиҳагьы ишьҭыҵит иахьа Аҧсны Аҳәынҭқарра жәларбжьаратәи азхаҵара анымҩаҧысуа аамҭазы. Убри аҟнытә адипломатиатәи аполитикатәи лшарақәеи реиҧш, хымҧада, хархәара рымазароуп аҭҵаарадырратә, акультуратә лшарақәагьы.

Аҧсуаҭҵааратә институт иазеиҕьасшьоит апҳьаҟагьы аҿиара, аизҳазыҕьара, уи аҵарауаа – аҭҵаарадырратә усураҟны аихьӡарақәа, аартра ҿыцқәа, аинститут аҭоурых хацзыркыз аҧсуа ҵарауаа дуқәа ирымаз агәамч.

Аҧсны Жәлар Реизара Аиҳабы В.Р. Бганба