Аҧсны Жәлар Реизара – Апарламент Аиҳабы Валери Кәарҷиа Аҧсны Аҳәынҭқарра Аиааиреи Ахьыҧшымреи 25 шықәса рхыҵра азгәаҭара иазку аныҳәатә усмҩаҧгатәқәа рыҽрылахәразы иахьа иааз  Приднестровиатәи Молдавиатәи Ареспублика Иреиҳаӡоу Ахеилак Ахантәаҩы Александр Шьерба напхгара ззиуа Приднестровиатәи Молдавиатәи Ареспублика аделегациа рҧылара мҩаҧигеит.  

Аделегациа иалоуп Приднестровиатәи Молдавиатәи Ареспублика Иреиҳаӡоу Ахеилак Ахантәаҩы Иабжьгаҩ Сергеи Широков, Приднестровиа Адәныҟатәи аусқәа рминистрра Ҧкаанҵала аиқәыршәаразы аусбарҭа аиҳабы Сергеи Череш, уи дицын Аҧсны Аҳәынҭқарраҟны иҟоу Приднестровиатәи Молдавиатәи Ареспублика Аофициалтә Хаҭарнак Гарри Кәупалба.

Аиҧылара иалахәын Аҧсны Жәлар Реизара – Апарламент Аиҳабы ихаҭыҧуаҩцәа Михаил Сангәлиа, Левон Галустиан, иара убас адепутатцәа Асҭамыр Логәуа, Ахра Абыхәба.

Асасцәа аҧсшәа раҳәо, Валери Кәарҷиа иазгәеиҭеит Аҧсны Аҳәынҭқарреи Приднестровиатәи Молдавиатәи Ареспубликеи  рофициалтә еизыҟазаашьақәа ашьақәгылара ишалагаз  1993 шықәсазы 1992–1993 шш.  Аҧсны Аџьынџьтәылатә еибашьра ашыкьымҭаз, урҭ ашықәсқәа инадыркны иахьа уажәраанӡа ҳара ҳзеиҧш интересқәа ишрызку ҳусеицура.  
«Ҳреспубликақәа рыбжьара аиқәшаҳаҭратә шьаҭа акраҵанакуеит, уи есааира аҽарҿыҵуеит», - иаҵшьны иҳәеит Аҧсны Жәлар Реизара – Апарламент Аиҳабы.  
  
Валери Кәарҷиа ихы иқәкны Александр Шьерба иаҵшьны иазгәеиҭеит Приднестровиатәи Молдавиатәи Ареспублика Иреиҳаӡоу Ахеилаки Аҧсны Жәлар Реизара – Апарламенти русеицура  амҽхак арҭбаара аҵак ду шамоу, азакәанҧҵаратә ҧышәеимдарагьы убрахь иналаҵаны.  
Аиҧылара иалахәыз алацәажәеит Аҧсны Аҳәынҭқарреи Приднестровиатәи Молдавиатәи Ареспубликеи русеицура арҵаулара атәы апарламентбжьаратә еизыҟазаашьақәа реиҧш, анагӡаратә мчхара  аганахьалагьы.  
Аиҧылара ахыркәшамҭаз Валери Кәарҷиеи Александр Шьербеи агәалашәаратә ҳамҭақәа еимырдеит.