НОВОСТИ

Аԥсны Жәлар Реизара – Апарламент Ақәҵара
27.07.2021
Поделиться в соцсетях:

Аԥсны Жәлар Реизара – Апарламент Ақәҵара

Ачымазара амҽхак аҭбаахареи ареспубликаҟны аепидемиологиатә ҭагылазаашьа иаалырҟьаны абааԥсхареи ачымазцәа рыбжьара иԥсуа рхыԥхьаӡара аизҳареи, авирус аҽеиҭакреи ачымазара еиҳа изыруадаҩуа аштамм ҿыцқәа  (британиатәии индиатәии) рцәырҵреи инарымаданы, Аԥсны Жәлар Реизара – Апарламент  атәыла анапхгара ишьақәнарӷәӷәаз антиковидтә усмҩаԥгатәқәа азхом ҳәа иаԥхьаӡоит.
Иҿыцу коронавирустә ҿкы COVID-19 зыхыьз рхыԥхьаӡара аизҳара хьаас иҟаҵаны,
аепидемиологиатә ҭагылазаашьа аҭышәныртәалара хықәыс ишьҭыхны,
Аԥсны Жәлар Реизара – Апарламент
и а қә н а ҵ о и т:

1. Ирабжьгазааит Аԥсны Аҳәынҭқарра Ахадеи Аԥсны Аҳәынҭқарра Аԥыза-министри иҿыцу коронавирустә ҿкы Covid-19 алаҵәара аԥырҟәҟәаара иазку абарҭ ауснагӡатәқәа рыдкылара:  
1) Аԥсны Аҳәынҭқарра Адгьылҵакыра зегьы аҟны ихымԥадатәиу асабрадатә режим ақәныҟәаразы ахылаԥшра алыршара;  
2) иақәиҭымзааит ауаажәларратә транспорт ала аиҭаҵра ахыхьчагатә маҭәахәқәа (амедицинатә сабрадақәа) ныҟәзымго, асоциалтә дистанциа еилазго амашьынаныҟәцаҩцәеи апассаџьырцәеи, иара убас иалыршазааит ауаажәларратә транспорт агәҽанҵаратә зҩыдатәра;
3) иаанкылазааит Аԥсны Аҳәынҭқарра адгьылҵакыра зегьы аҟны  ачаратә, акультуратә, абаҩрҵәыратә, арлахҿыхратә, алабаратә, ацәыргақәҵатә, егьырҭ ауаа рацәа злахәу аусмҩаԥгатәқәа иарку аҭыԥқәа рыҟнеиԥш, иаарту аҭыԥқәа рҟынгьы рымҩаԥгара;  
4) иалыршазааит иҿыцу короновирустә ҿкы ахәышәтәра иадԥхьалоу амедицинатә усзуҩцәа ианаамҭоу руалафахәи ацҵақәеи рызшәара хылаԥшра аҭара;    
6) ирӷәӷәазааит асанитартә-епидемиологиатә хылаԥшра ахәаахәҭратә обиектқәа русураҟны, анхарҭатә ҭыԥқәа (асасааирҭақәа, аԥсшьарҭа ҩнқәа) рыҟны, амаҵзура аҭыԥқәа рыҟны, имҩаԥгалазааит атуристцәа ахьынхо аҭыԥқәа рахь инеиуа ахаҿқәа ршоурашәара;  
7) Аԥсны Аҳәынҭқарра Агәабзиарахьчара аминистрра АИХ радԥхьаларала иалнаршааит ауааԥсыра адырра рыҭара (асоциалтә ӡыргара) COVID-19 аламырҵәаразы агәҽанҵара иазку ауснагӡатәқәа рзы, алаҵаҟаҵаразы, иара убас ачымазара аҷыдарақәа анцәырҵ иҟаҵатәу азы;  
8) ирӷәӷәазааит Агәабзиарахьчара аминистрра Асанипедстанциа аганахьала ауаажәларратә крыфарҭақәа (аресторанқәа, акафеқәа, абарқәа, аԥацхақәа, акрыфарҭақәа, какалкырҭақәа, егьырҭ, ауаажәларратә крыфарҭа аобиектқәа)  иҿыцу   агәҽанҵаратә епидемиологиатә уснагӡатәқәа рынагӡашьа ахылаԥшра;  
9) хара имгакәа иаагазааит коронавирустә ҿкы ахәышәтәреи агәҽанҵареи рзы иаҭаху ахәшәқәа (Актемра, Артлегиа, COVID-19 азы авакцина);
10) иаанкылазааит ашколнӡатәи аҵараиуратә усҳәарҭақәа русура;
11) аҳәынҭқарратә напхгараҭара аусбарҭақәа, аҳәынҭқарратә усҳәарҭақәа, анаплакқәа, аиҿкаарақәа  рнапхгаҩцәа коронавирустә ҿкы COVID-19 ацәыхьчаразы 60 шықәса иреиҳаны изхыҵуа аусуҩцәеи, ашколнӡатәи ақәра змоу ахшара змоу аусуҩцәа рџьатә (рмаҵуратә) напынҵақәа рынагӡараҟнытә рхы иақәиҭтәызааит руалафахәы еиқәырханы.  
12) иаанкылазааит акультуратә усҳәарҭақәа (атеатрқәа, амузеиқәа, абиблиотекақәа, акультуратә центрқәа, акультура ҩнқәа, аконцерттәи ацәыргақәҵатә залқәеи) русура;    
2. Аԥсны Аҳәынҭқарра Аԥыза-министр иалиршааит коронавирустә ҿкы алаҵәара аҿагылара иазку Акоординациатә штаб аусуразы иааиԥмырҟьаӡакәа адырраҟаҵара  
3. Аԥсны ауааԥсыра 2021 шықәса лаҵарамза 13 аҟнытә, № 175-рп (2021 ш. рашәарамза 29 аҟнытә аԥсахрақәа зцу, № 228-рп) «Аԥсны Аҳәынҭқарра ауааԥсыра коронавирустә ҿкы Covid-19 рацәыхьчара иазку ауснагӡатәқәа рзы» Аԥсны Аҳәынҭқарра Ахада Идҵа еиламгакәа иқәныҟәалааит.    
4. Абри Ақәҵара Аԥсны Аҳәынҭқарра Ахадеи Аԥсны Аҳәынҭқарра Аминистрцәа реилазаареи рышҟа ишьҭызааит.
5. Абри Ааԥхьара кьыԥхьзааит амассатә информациа хархәагақәа рыҟны.
6.   Абри Ақәҵара  амч аиуеит иара анрыдкылаха аҽны инаркны.  

Аԥсны Жәлар Реизара – Апарламент
Аиҳабы                                                            В. Кәарҷиа