Имҩаԥысит Аԥсны Жәлар Реизара – Апарламент Аиҳабы Валери Кәарҷиа имҩаԥигаз есымчыбжьатәи апарламенттә еилацәажәара.

Аилацәажәараан адепутатцәа ааигәа имҩаԥысраны иҟоу аусура азԥхьагәаҭақәа ирзааҭгылеит. Урҭ рыҩныҵҟа иҟоуп ҭагалантәи асессиа аилатәарақәа рыҟны иалкаау азакәанапроектқәа рыхәаԥшра иадҳәалоу азҵаарақәа, иара убас Апарламенти анагӡаратә мчхареи русеицураҟны иактуалтәу азҵаарақәа.
  
Апарламент адепутатцәа алацәажәеит абылтәы аџьырмыкьаҟны иҟоу аҭагылазаашьеи ҳазҭагылоу аамҭазы афымцамчтә усхк аҭагылазаашьеи ирызку азҵаарақәа.

Абиуџьети, акредиттә еиҿкаарақәеи, ашәахтәқәеи, афинансқәеи рзы Аԥсны Жәлар Реизара – Апарламент  аилак ахантәаҩы Натали Смыр ирыдылгалеит анефтаалыҵқәа раагаҩцәа алархәны инарҭбаау аилатәара амҩаԥгара.