Аԥсны Жәлар Реизара – Апараламент адепутатцәа Гиви Кәарҷиеи Асҭамыр Логәуеи 2021 шықәса жьҭаарамза 12-13 рзы Женева имҩаԥысуаз Нхыҵ Кавказ ашәарҭадареи аҭышәынтәалареи рзы Жәларбжьаратәи Женеватәи адискуссиақәа 54-тәи рраунд иалахәыз Аԥсны Аҳәынҭқарра аделегациа иалан.

Аԥснытәи аделегациа аилазаараҟны иҟан Адәныҟатәи аусқәа рминистр ихаҭыԥуаҩ  Иракли Ҭыжәба, Аҳәынҭқарратә шәарҭадара амаҵзура ахантәаҩы ихаҭыԥуаҩ Заал Хәарҵкьиа, Аԥсны Аҳәынҭқарра Адәныҟатәи аусқәа рминистрра аусзуҩцәа.  

Адискуссиақәа ирылахәын Алада Уаԥстәыла Ареспублика, Қырҭтәыла, Урыстәылатәи Афедерациа, ЕАА рхаҭарнакцәа, аицхантәаҩра руан ЕЕР, ЕА, ААЕА.
  
Аԥсны Аҳәынҭқарра Адәныҟатәи аусқәа рминистрра ишаанацҳауала, изаамҭанытәиу Жәларбжьаратәи Женеватәи адискуссиақәа 54-тәи рраунд мҩаԥысуан ҩ-гәыԥк рыҟны: ашәарҭадареи агуманитартә зҵаарақәеи рзы.  

Аиҿцәажәарақәа реихшьалақәа рыла аицхантәаҩцәа ирыдыргалеит Жәларбжьаратәи Женеватәи адискуссиақәа аԥхьаҟатәи аусура шьаҭас иаиуа азеиԥш документ азырхиара.

Жәларбжьаратәи Женеватәи адискуссиақәа изаамҭанытәиу рраунд азԥхьагәаҭоуп 2021 шықәса ԥхынҷкәынмза 7-8 рзы.