Аԥсны Жәлар Реизара – Апарламент Аиҳабы В. Кәарҷиа «Адемократиеи ажәларқәа рзинқәеи рзы» Ауаажәларра алахәцәа - аҳәынҭқаррақәа рпарламентбжьаратә Ассамблеиа Амаӡаныҟәгаҩ Хада Григори Маракуца Иирамш идиныҳәалеит.
Адныҳәалараҟны иҳәоуп:

«Ҳаҭыр зқәу Григори Степан-иԥа!

Аԥсны Жәлар Реизара – Апарламент адепутатцәа рыхьӡала гәык-ԥсыкала ишәыдысныҳәалоит  Шәира амш!
Шәара зыхьӡ Приднестровиа анҭыҵгьы еицырдыруа иналукааша аҳәынҭқарратә, аполитикатә, ауаажәларратә усзуҩуп. Шәара шәыпрофессионализм ду, шәтәылауаҩратә позициа хымԥада аҳаҭыр ду иаԥсоуп.  

Ҳара ахә ҳаракны иаҳшьоит Аԥсны Аҳәынҭқарреи Приднестровтәи Молдавиатәи Арресубликеи рпарламентбжьаратә еизыҟазаашьақәеи русеицуреи рырҿиараҟны Шәара шәлагаламҭа. Шәара ҳҳәынҭқаррақәа раҳаҭыр арӷәӷәареи жәларбжьаратәи аусқәа рыҟны урҭ рпозициа алаҳәареи рыҟны аҵак ду змоу, аҭынчра аиқәырхареи, аҭышәынтәалара арӷәӷәареи, адемократиа арҿиареи ирыцхраауаз Ауаажәларра «Адемократиеи ажәларқәа рзинқәеи» аԥҵара ахыҵхырҭақәа рыҟны шәгылан.

Абри аныҳәамш аҽны ишәзеиӷьаҳшьоит агәабзиара, аҭынчра, ахирра».