2021 шықәса ԥхынҷкәынмза 7-8 рзы имҩаԥысуаз Нхыҵ Кавказ ашәарҭадареи аҭышәынтәалареи рзы Женеватәи адискуссиақәа 55-тәи рраунд иалахәыз аделегациаҟны иҟан Аԥсны Жәлар Реизара – Апарламент адепутатцәа Натали Смыр, Каха Пертаиа, Инал Ҭарба.
Аԥснытәи аделегациа аилазаараҟны иҟан адәныҟатәи аусқәа рминистр Иракли Тыжәба, Аԥсны Аҳәынҭқарра Ахада Иадминистрациа Анапхгаҩы ихаҭыԥуаҩ Саида Быҭәба, Аҳәынҭқарратә Шәарҭадара Амаҵзура ахантәаҩы ихаҭыԥуаҩ Заал Хәарҵкьиа, Аԥсны Аҳәынҭқарра Асанитартә ҳақьым хада Лиудмила Скорик, Аԥсны Аҳәынҭқарра Адәныҟатәи аусқәа рминистрра аусзуҩцәа.
Адискуссиақәа ирылахәын Алада Уаԥстәыла Ареспублика, Қырҭтәыла, ЕАА рхаҭарнакцәа, хантәаҩра руан Еиду Амилаҭқәа Реиҿкаара, Европатәи Аидгыла, ОБСЕ.
Аԥсны Аҳәынҭқарра Адәныҟатәи аусқәа рминистрра излаанацҳауала,
Женеватәи адискуссиақәа 55-тәи рраунд аусура традициала ашәарҭадареи агуманитартәи зҵаарақәа ирызкыз ҩ-гәыԥк рыҟны имҩаԥысуан.  .  
Аԥсны ахаҭарнакцәа рганахьала иалкааны хшыҩзышьҭра аҭан амч ахамырхәаразы жәларбжьаратәи ахәдықәҵара иазку адокумент атекст аҟны аганқәа реиқәшаҳаҭразы аусура аиҭахацыкра. Ақырҭуа делегациа ишыҟанаҵац еиԥш, традициала аҵак ду змоу ари азҵаара алацәажәара мап ацәыркит. Аицхантәаҩцәа абри адокумент азы ажәалагалақәа азырхианы ааигәа имҩаԥысраны иҟоу араунд аҟны ицәырыргараны иҟоуп.      
Жәларбжьаратәи адискуссиақәа изаамҭанытәиу рраунд  азгәаҭоуп 2022 шықәса хәажәкырамза 29-30 рзы.