Аԥсны Жәлар Реизара - Апарламент аҟны имҩаԥысит Абиуџьети, акредиттә еиҿкаарақәеи, ашәахтәқәеи афинансқәеи рзы аилак ахантәаҩы Натали Смыр имҩаԥылгаз инарҭбаау аилатәара. Аилатәарахь иааԥхьан аԥыза-министр ихаҭыԥуаҩ, афинансқәа рминистр Владимир Делба, уи ихаҭыԥуаҩ Ирма Амыҷба, Аԥсны Аҳәынҭқарра Амилаҭтә Банк Ахантәаҩы Беслан Бараҭелиа, Аԥсны Аҳәынҭқарра Аконтрольтә палата Ахантәаҩы Роберт Аршба.

Амшхәаԥштә аҟны иахәаԥшын «2022 шықәсазтәи Аԥсны Аҳәынҭқарра Ареспубликатә биуџьет азы» Аԥсны Аҳәынҭқарра Азакәан апроект.

Аилатәара алахәцәа инарҭбааны иалацәажәеит ареспубликатә биуџьет ахышәа-ҵышәарақәа. Аилацәажәараан аԥыза-министр ихаҭыԥуаҩ, афинансқәа рминистр Владимир Делба адепутатцәа рызҵаарақәа жәпакы рҭакқәа ҟаиҵеит, уи ашьҭахь аилак иаӡбеит ари азакәанапроект Аԥсны Жәлар Реизара – Апарламент ааигәа имҩаԥысраны иҟоу аилатәараҟны иахәаԥшырц, актәи аԥхьараан адкыларазы.
Адепутцтәа ахәаԥшит иара убас «2022 шықәсазтәи Аԥсны Аҳәынҭқарра Амилаҭтә Банк Аныхтәқәа рхарџьынҵа ашьақәырӷәӷәаразы», «Аԥсны Аҳәынҭқарра Амилаҭтә Банк  адәныҟатәи аудит амҩаԥгаразы Аԥсны Аҳәынҭқарра Амилаҭтә Банк аудитор изы», «2022 шықәсазтәи иаку аҳәынҭқарратә аԥара-кредиттә политика ахырхарҭа хадақәа рзы»  ақәҵарақәа рыпроектқәа.

Аилацәажәара ашьҭахь Аилак алахәцәа азыӡба рыдыркылеитт ари азакәанапроект Аԥсны Жәлар Реизара – Апарламент ааигәа имҩаԥысраны иҟоу аилатәараҟны ахәаԥшразы ирыдыргаларц.