Аԥсны Жәлар Реизара-Апарламент Аиҳабы Лаша Ашәба Аԥсны Аҳәынҭқарра апрокурор Адгәыр Агрбеи апрокуратура аколлектив зегьи ирыдиныҳәалеит рзанааҭтә ныҳәа – Аԥсны Аҳәынҭқарра апрокуратура амш.

  Адныҳәалараҟны иҳәоуп:

«Ҳаҭыр зқәу Адгәыр Нугзар-иԥа! Ҳаҭыр зқәу апрокуратура аусбарҭа аусзуҩцәеи аветеранцәеи!

Аԥсны Жәлар Реизара-Апарламент ахьӡала ишәыдысныҳәалоит шәзанааҭтә ныҳәа - Аԥсны Аҳәынҭқарра апрокуратура амши Аԥсны Аҳәынҭқарра апрокуратура аԥҵеижьҭеи 28 шықәса аҵра арыцхәи.
Шәара шәзанааҭ – ҳреспубликаҟны азинхьчаратә усбарҭақәа рсистемаҟны акырӡа зҵазкуа акоуп. Шәара шәыпрофессионализми шәазыҟаҵареи рыҩаӡара зеиԥшроу еиԥш ауп ҳтәылауааи ҳҳәынҭқарреи изакәану рзинқәеи ринтересқәеи хаҭабзиара ҳаракыла рыхьчара шалыршахо.

Гәык-ԥсык ала ишәзеиӷьасшьоит аихьӡарақәа, азанааҭтә уснагӡатәқәа рыӡбараан алшареи агәрагареи».