Ҟабарда-Балҟариатәи Ареспублика Хатәгәаҧхаралатәи аҧснытәи аибашьцәа реидгыла ааҧхьарала Аҧсны Жәлар Реизара – Апарламент Аиҳабы ихаҭыҧуаҩ Фазлыбеи Аҩӡба напхгара ззиуа Аҧсны Аҳәынҭқарра аделегациа Аҧсны Афырхаҵа, «Ахьӡ-Аҧша» аорден I аҩаӡара занашьоу, СССР Абираҟ Ҟаҧшь Аорден занашьоу, аҳәынҭқарратә, арратә усзуҩы, аинрал-леитенант Султан Асламбек-иҧа Сосналиев диижьҭеи 80-шықәса аҵра иазку агәалашәаратә усмҩаҧгатәқәа ирылахәуп.

Иахьа Ҟабарда-Балҟариатәи Ареспубликаҟны ихацыркхаз аусмҩаҧгатә апрограмма аҳәаақәа ирҭагӡаны имҩаҧысуеит 1992–1993 шш. Аҧсны Аџьынџьтәылатә еибашьра хатәгәаҧхаралатәи аибашьцәеи аветеранцәеи реиҧылара, Аҧсны Аҳәынҭқарреи Ҟабарда-Балҟариатәи Ареспублика аспортсменцәеи рыбжьара зхы иақәиҭу ақәҧаразы аицлабрақәа.

Аныҳәатә усмҩаҧгатә аҟны ауаажәларра рҧылараан Фазлыбеи Аҩӡба дықәгылеит ажәахә ҟаҵаны, ахә ҳаракны ишьеит Кавказ ашьхарыуа жәларқәеи, Жәларбжьаратәи ачерқьес ассоциациеи, Аҩадатәи Кавказ ажәларқәа хатәгәаҧхаралатәи рықәгылареи рроль, иара убас 1992–1993 шш. Аҧсны Аџьынџьтәылатә еибашьраан Аҧсны Аҳәынҭқарра Арбџьар Мчқәа рышьақәгылараҟны, ақырҭуа мпыҵахалаҩцәа рырхәҭақәа риааираҟны хаҭала Султан Сосналиев илагаламҭа.

Ф. Аҩӡба иқәгылараҟны иаҵшьны иҳәан аибашьратә хҭысқәа раан Аҧсныҟа ишааз ҩ-нызқь инареиҳаны хатәгәаҧхаралатәи аибашьцәа. Аҧсуааи дареи хылҵшьҭрала реизааигәара, ирымоу аҭоурых-культуратә акра аҵак дуӡӡа шамаз Аҩадатәи Кавкази аҳәаанырцәтәи адиаспореи рхаҭарнакцәа рзы.  

Аҧсны Жәлар Реизара – Апарламент Аиҳабы ихаҭыҧуаҩ Фазлыбеи Аҩӡба Ҟабарда-Балҟариатәи Ареспублика аиашьаратә жәлар ирзеиҕьеишьеит ахирра, аҭынчра, аизҳазыҕьара.