Аԥсны Аҳәынҭқарра аминистрцәа реилазаара аконференц-зал аҟны имҩаԥысит Аԥсны Аҳәынҭқарра Аиустициа аминистрра Аӡбаратә нагӡаҩцәа рмаҵзура хәышықәса ахыҵра иазкыз аныҳәатә усмҩаԥгатә.

Аусмҩаԥгатә иалахәын  Аԥсны Жәлар Реизара – Апарламент Аиҳабы Лаша Ашәба, аԥыза-министр ихаҭыԥуаҩ, афинансқәа рминистр Владимир Делба, аиустициа аминистр Анри Барцыц, Аӡбаратә нагӡаҩцәа рмаҵзура анапхгаҩы Зураб Барцыц, аҩныҵҟатәи аусқәа рминистр Вальтер Быҭәба, аԥыза-министр ихаҭыԥуаҩ Сергеиа Пустовалов, амчратә еилазаарақәа рнапхгаҩцәа.

Аԥсны Жәлар Реизара – Апарламент аппарат анапхгаҩы Вадим Бжьаниа Апарламент ахьӡала адныҳәаларатә шәҟәы даԥхьеит:
  
«Аԥсны Жәлар Реизара – Апарламент ахьӡала гәык-ԥсык ала Шәаргьы Аԥсны Аҳәынҭқарра Аиустициа аминистрра Аӡбаратә нагӡаҩцәа рмаҵзура аколлективгьы ишәыдысныҳәалоит Амаҵзура аԥҵоижьҭеи хәышықәса аҵра.  

Аԥсны Аҳәынҭқарра азакәанԥҵара ақәныҟәарала Аӡбаратә нагӡаҩцәа рмаҵзура аколлектив кәҿиарала анапы иану ауснагӡатәқәа нанагӡоит, аҳәынҭқарра ахьӡала аҿаԥхьа иқәгылоу иҿыцу аҳасабтәқәа рыӡбарагьы иазхиоуп.  
Аӡбаратә нагӡаҩцәа аҳәынҭқарреи, атәылауааи, аиҿкаарақәеи рзинқәеи закәанла ирымоу ринтересқәеи рыхьчара, аӡбаратә актқәа рынагӡареи ирызку аусура аџьабаа, аҭакԥхықәра, апринципра аҭахуп. Сгәы иаанагоит, ишәымоу аԥышәеи узықәгәыӷыртә иҟоу акадртә лшара Шәмаҵзура аусураҟны ицәырҵуа ауадаҩрақәа зегьы риааира шшәылнаршо.
Иҭабуп ҳәа расҳәоит Аԥсны Аҳәынҭқарра Аиустициа аминистрра Аӡбаратә нагӡаҩцәа рмаҵзура аусзуҩцәа иҳаҩсыз ашықәсқәа рзы имҩаԥыргаз аусуразы, ирзеиӷьасшьоит занааҭла аизҳареи рнапы зларкуа аусқәа зегьы рыҟны аихьӡарақәеи».