Лаҵарамза 19 рзы Аԥсны Жәлар Реизара – Апарламент Абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы ихаҭыԥуаҩ Дмитри Маршьан Ҟарачы-Черқьестәи Ареспублика иаҭаз Аԥсны Аҳәынҭқарра аделегациа далахәын.
Аделегациа иалахәын: Аԥсны Аҳәынҭқарра аҭҵаарадырреи акультуреи рзы Ахада иабжьгаҩ Нугзар Логәуа, акультура аминистр Даур Ақаҩба, Аҩада Кавказ хатәгәаԥхаралатәи аибашьцәа аус рыцура азҵаарақәа рзы Ахада иабжьгаҩ Рисмаг Аџьынџьал, Ареспубликатә уаажәларратә еиҿкаара «Москватәи Аԥсуа диаспора» ахаҭарнак Оҭар Ласариа, Аԥсны ауаажәларратә, аполитикатә усзуҩы Беслан Кобахиа.

Ҟарачы-Черқьестәи Ареспублика акультура аминистр Зураб Агирбов Аԥсны ахаҭарнакцәа идикылеит, аиԥылара апрограмма зегьы аҩныҵҟа имҩаԥысуаз аусмҩаԥгатәқәа рыҟны дрыцын.

Аделегатцәа Ҟарачы-Черқьестәи Ареспублика Абазақәа рраион иаҭааит. Ара имҩаԥысит Абазақәа рраион ахада Руслан Кужеви, абаз интеллигенциеи, ауаажәларратә еиҿкаарақәеи, 1992–1993 шш. Аԥсны Аџьынџьтәылатә еибашьра хатәгәаԥхаратәи аибашьцәеи рхаҭарнакцәеи, Черқьеск ақалақь Адума адепутатцәеи дареи реиԥылара.  
  
Лаҵарамза 20 рзы Ԥсыж ақыҭаҟны имҩаԥысит аԥснытәии урыстәылатәии ауаажәларра-политикатә усзуҩы, Аԥсуа-абаза жәлар жәларбжьаратәи рассоциациа аԥҵаҩы Тарас Шамба изкыз ахәылԥаз. Ахәылԥаз иалахәыз Тарас Мирон-иԥа дыргәаладыршәеит, иҩызареи аус ицуреи ртәы иалацәажәеит.

Лаҵарамза 21 азы Аԥсны Аҳәынҭқарра аделегациа Аҩада-Кавказтәи аҳәынҭқарратә академиа иаҭааит. Имҩаԥысит уи аректор Руслан Кочкарови дареи реиԥылара.