Имҩаԥысит Аԥсны Жәлар Реизара-Апарламент абиуџьети, акредиттә еиҿкаарақәеи, ашәахтәқәеи, афинансқәеи рзы аилак аилатәара
Апарламент аҟны имҩаԥысит Аԥсны Жәлар Реизара-Апарламент абиуџьети, акредиттә еиҿкаарақәеи, ашәахтәқәеи, афинансқәеи рзы аилак аилатәара.

Беслан Ҳалуашь имҩаԥигаз аилатәара иалахәын адепутатцәа, Аԥсны Аҳәынҭқарра Ахада Иадминистрациа аҳәынҭқарра-зинтә напхгараҭара аиҳабы Наҭела Ламиа, Аԥсны Аҳәынҭқарра Амилаҭтә банк ахантәаҩы Беслан Бараҭелиа, уи ихаҭыԥуаҩ Диана Занҭариа.
Ишьақәырӷәӷәаз амш азҵаара инақәыршәаны, иахәаԥшын «Аԥсны Аҳәынҭқарра Амилаҭтә банк 2021 шықәсазтәи аҳасабырбазы» ақәҵара апроект. Абанк азы аҳасабырба ҟаиҵеит Беслан Бараҭелиа.

Аилатәара иалахәыз алацәажәеит абанктә усхк ҳазҭагылоу аамҭазы аҭагылазаашьа, акредиттәра алшара арҭбаара, абанкқәа русураҟны иҟоу ауадаҩрақәа, атехникатә ҟазшьа змоуи абанктә закәанԥҵара аиӷьтәреи ирызку азҵаарақәа.  

Аилацәажәара аихшьалақәа рыла аилак аӡбара аднакылеит ари апроект адкыларазы Аԥсны Жәлар Реизара-Апарламент асессиа аилатәарахь анагара.

Адепутатцәа алацәажәеит, аӡбамҭагьы рыдыркылеит Апарламент иаднагаларц ааигәа имҩаԥысраны иҟоу асессиа аилатәараҟны «Атауар аҭыжьразы зыда ԥсыхәа ыҟам атехнологиатә мыруга аиқәыԥхьаӡа (еидызкылои уи иацу аԥсахга хәҭақәеи уахь иналаҵаны), зеиԥш Аԥсны Аҳәынҭқарра адгьылҵакыраҟны иҭырмыжьуа, зҭагалара Аԥсны Аҳәынҭқарра аҳазалхратә дгьылҵакырахь ашәахтәқәҵара иаҵанамкуа (ашәахтәқәҵараҟнытә ахы иақәиҭтәхоит)», Аԥсны Аҳәынҭқарра Аминистрцәа реилазаара Ақәҵара 2016 шықәса лаҵарамза 27 аҟнытә №87 ала  ишьақәырӷәӷәоу» аԥсахрақәа ралагаларазы  Аԥсны Аҳәынҭқарра Аминистрцәа реилазаара Ақәҵара ашьақәырӷәӷәара.

Аилак ирыднагалеит Аԥсны Жәлар Реизара-Апарламент асессиа аилатәараҟны «Акриптовалиутақәа рырҳаразы анаплакратә усура аҳәаақәҵаразы», «Хазы игоу аусура хкқәак алицензиа рыҭаразы» азакәанапроектқәа раанкылара.

Иара убас иахәаԥшын «Аԥсны Аҳәынҭқарра азакәанԥҵаратә актқәак ИАА (Изыцҵоу Ахәԥсазы Ашәахтә аҳәаақәҵара ахәҭаҿы) азакәан апроект аԥсахрақәа рагаларазы» азакәан апроект. Абри азҵааразы Аԥсны Аҳәынҭқарра Ахада Иадминистрациа аҳәынҭқарра-зинтә напхгараҭара аиҳабы Наҭела Ламиа иҟалҵаз аҳәарала адепутатцәа азакәан апроект еиҭа аус адуларазы аӡбамҭа рыдыркылеит.