Имҩаԥысит Аҧсны Жәлар Реизара – Апарламент Аиҳабы Лаша Ашәба хантәаҩра ззиуаз ааԥынтәи асессиа аилатәара.
Ишьақәырӷәӷәоу амш азҵаара инақәыршәаны, абжьыҭара алҵшәақәа рыла ирыдыркылеит ақәҵарақәа жәпакы.

Адепутатцәа Алхас Ҳагбеи Алмас Акабеи Аԥсны Аҳәынҭқарра азакәанԥҵаратә мчхара аҟнытә Аԥсны Аҳәынҭқарра аӡбаҩцәа р-Квалификациатә комиссиахь хаҭарнакцәас иалхуп.
Аԥсны Аҳәынҭқарра адукатәцәа рпалатаҟны иҟоу Аквалификациатә комиссиахь Аҧсны Жәлар Реизара – Апарламент аҟнытә ахаҭарнакс далагалоуп Дырмит Маршьан.

Иара убас ирыдыркылеит Аҧсны Жәлар Реизара – Апарламент аилакқәа хаҭалатәии хыԥхьаӡаралатәии аилазаарақәа рышьақәыргыларазы ақәҵарақәа. Урҭ инарықәыршәаны, адепутат Леонид Лакербаиа Абиуџьети, акредиттә еиҿкаарақәеи, ашәахтәқәеи афинансқәеи рзы аилаки Асоциалтә политикеи, аџьеи, агәабзиарахьчареи, адемографиеи, аибашьра аветеранцәеи аинвалидцәеи русқәа рзы аилаки дрылагалоуп.

Адепутат Асҭамыр Герхьелиа Аграртә политикеи, аԥсабаратә лшарақәеи аекологиеи реилак далганы Аекономикатә политикеи, ареформақәеи аинформациатә технологиақәеи реилак далаҵоуп.
Ирыдыркылеит «Аҧсны Жәлар Реизара – Апарламент  Аԥҟараҟны аԥсахрақәа рзы апроект азырхиаразы Аҧсны Жәлар Реизара – Апарламент аусуратә гәыԥ азы» ақәҵара. Иаԥҵоу аусуратә гәыԥ иалалеит:  
Дауҭ Хәытаба – аусуратә гәыԥ ахантәаҩы, Аҳәынҭқарратә-зинтә политиказы аилак ахантәаҩы, Беслан Ҳалуашь – Абиуџьети, акредиттә еиҿкаарақәеи, ашәахтәқәеи афинансқәеи рзы аилак ахантәаҩы; Адгәыр Ҳаразиа – Аҳәынҭқарратә-зинтә политиказы аилак алахәҩы; Вадим Бжьаниа – Аҧсны Жәлар Реизара – Апарламент Аппарат анапхгаҩы; Луиза Ҭарба – Аҧсны Жәлар Реизара – Апарламент азинтәи аналитикатәи ҟәша аиҳабы; Инна Кәарҷиа – Аҧсны Жәлар Реизара – Апарламент азакәанапроекттә усура аҟәша аиҳабы; Беслан Аршба – Аҧсны Жәлар Реизара – Апарламент азинтәи аналитикатәи ҟәша ареферент еиҳабы; Алиса Арӡынба – Аҧсны Жәлар Реизара – Апарламент азинтәи аналитикатәи ҟәша ареферент.

Адепутатцәа ахәаԥшит иагьрыдыркылеит «Аҧсны Жәлар Реизара – Апарламент Аԥҟара аԥсахрақәа ралагаларазы» Ақәҵара.
Уи инақәыршәаны, Апарламент ԥасатәи ааԥхьара аҵыхәтәантәи аԥхьараан ирыдрымкылаз азакәанапроектқәа, ирыдыркылаз, аха амч змауз азакәанқәа Апарламент иҿыцу ааԥхьара ишьақәыргылоу абри Аԥҟарала иалшоит азакәанқәа рыхәаԥшреи рыдкылареи.    
Асессиа аилатәараан адепутатцәа иара убас иалацәажәеит Аԥсны Аҳәынҭқарра Аминистрцәа реилазаара Гәылрыԥшь аҳ. 0,06 га зҵазкуа адгьыл ҭыԥ «Ақыҭанхамҩатә ҵакы змоу адгьылқәа ркатегориаҟнытә» «анхарҭа дгьылқәа» ркатегориахь аиагара рақәиҭтәра азҵаара, ишақәшаҳаҭхаз алагьы ақәҵара рыдыркылеит.  
«Аԥсны Аҳәынҭқарраҟны иҟоу Ауаҩы изинқәа рзы Азинмчызмоу изы» Аԥсны Аҳәынҭқарра Азакәан ахәҭаҷ 19 ахәҭа 2 инақәыршәаны Апарламент адепутатцәа азыӡырҩит иагьрыдыркылеит Аԥсны Аҳәынҭқарраҟны иҟоу Ауаҩы изинқәа рзы Азинмчызмоу Асида Шьаҟрыл ирыдылгалаз 2021 ш. лусура иазкыз ажәахә.