Аҧсны Жәлар Реизара – Апарламент аҟны имҩаԥысит Аԥсны Жәлар Реизара – Апарламент абиуџьети, акредиттә еиҿкаарақәеи, ашәахтәқәеи, афинансқәеи рзы Аилак инарҭбаау аилатәара. Аилатәараҟны ирыхәаԥшын азакәанапроектқәа:

«2021 шықәсазтәи Ареспубликатә биуџьет анагӡаразы»; «Аԥсны Аҳәынҭқарра Атәанчаратә фонд 2021 шықәсазтәи абиуџьет анагӡаразы»; «1992–1993 шш. аԥсны Аџьынџьтәылатә еибашьра аинвалидцәа Аҳәынҭқарратә ибиуџьеттәым рфонд 2021 шықәсазтәи абиуџьет анагӡаразы»; «Аԥсны Аҳәынҭқарра Асоциалтә ԥгаԥсареи аџьа ахьчареи рфонд 2021 шықәсазтәи абиуџьет анагӡаразы»; «Аԥсны Аҳәынҭқарра Амҩатә фонд 2021 шықәсазтәи абиуџьет анагӡаразы»; «Аԥсны Аҳәынҭқарра Ихымԥадатәиу амедицинатә ԥгаԥса афонд 2021 шықәсазтәи абиуџьет анагӡаразы».

Аилак аилатәара мҩаԥысит Беслана Ҳалуашь ихантәаҩрала, уи  иалахәын Апарламент адепутатцәа, Аԥсны Ахада Иадминистрациа аҳәынҭқарра-зинтә напхгарҭа аиҳабы Натела Ломиа, аԥыза-министр ихаҭыԥуаҩ, афинансқәа рминистр Владимир Делбеи уи ихаҭыԥуаҩ Ирма Амҷба, Аконтрольтә палата ахантәаҩы Роберт Аршбеи уи ихаҭыԥуаҩ Зураб Оҭырбеи, ибиуџьеттәым афондқәа рнапхгаҩцәа.
Аилацәажаәара аихшьалақәа рыла Аилак иаднакылеит азыӡба «Аԥсны Аҳәынҭқарра 2021 шықәсазтәи Ареспубликатә биуџьет анагӡаразы» азакәанапроект, иара убас Аԥсны Аҳәынҭқарра аҳәынҭқарратә ибиуџьеттәым афондқәа 2021 шықәсазтәи рбиуџьет анагӡаразы азакәан апроектқәа Аҧсны Жәлар Реизара – Апарламент асессиа аилатәарахь рнагара актәи аԥхьараан ирыдыркыларц азы.