Апарламент аҟны имҩаԥысит Аҧсны Жәлар Реизара – Апарламент Аиҳабы Лаша Ашәбеи Арегионбжьаратәи акультуратәи еимадаракәа рыла аҳәаанырцәтәи атәылақәа рымадаразы УА Ахада Иусбарҭа аиҳабы иԥылара Игор Маслови реиԥылара.

Аиԥылара иалахәын иара убас Апарламент Аиҳабы ихаҭыԥуаҩцәа Фазлыбеи Аҩӡбеи Ашот Миносиани, Ахада Иадминистрациа Анапхгаҩы Алхас Кәыҵниа, Аԥсны Аҳәынҭқарраҟны иҟоу УА аусқәа рзы аамҭалатәи агәрага Максим Литвинов.

Аиԥылара аартуа, Лаша Ашәба иҳәеит:

«Ҳаҭыр зқәу Игор Венедикт-иԥа, ҳара иаадыруеит Шәара 2000-тәи ашықәс алагамҭазы Аԥсны аус шыжәуаз, ҳара ҳаҭырла ҳашәзыҟоуп, ахә ҳаракны иаҳшьоит аԥсны-урыстәылатәи аизыҟазаашьақәа рыҿиараҟны шәлагаламҭа».

Апарламент Аиҳабы ихы иқәкны, Игор Маслов иҭабуп ахиҳәааит аиԥылара, иҳәеит уи зегьы рзы аҵакы шамоу. «Хықәкык ауп иҳамоу, уи Аԥсны аҿиареи аизҳазыӷьареи роуп», – иҳәеит Арегионбжьаратәи акультуратәи еимадаракәа рыла аҳәаанырцәтәи атәылақәа рымадаразы УА Ахада Иусбарҭа аиҳабы.
Аиԥылараан Апарламент Аиҳабы даҽазныкгьы ишьҭихит аԥсны-урыстәылатәи Аҳәынҭқарратә ҳәаа ахысра армариареи авиаеимадара аартра актуалреи рызҵаара. Иара убас аиԥылара иалахәыз алацәажәеит аԥсны-урыстәылатәи аусеицура азҵаарақәа жәпакы.