Аԥсны Жәлар Реизара - Апарламент Аиҳабы Лаша Ашәба иналукааша ауаажәларратә, аполитикатә усзуҩы Иакуб Уасил-иԥа Лакоба иԥсҭазаара иалҵра инамадны иуацәеи иҭынхацәеи дрыдышшылеит.
Адышшылараҟны иҳәоуп:

«Аԥсны Жәлар Реизара - Апарламент ахьӡала гәалсра дула срыдышшылоит Иакуб Уасил-иԥа Лакоба иԥсҭазаара иалҵра инамадны иуацәеи иҭынхацәеи.

Иакуб Уасил-иԥа Лакоба Аԥсны анҭыҵгьы еицырдыруаз иналукааша ауаажәларратә, аполитикатә усзуҩын.
Ажәа азҟаза ду, апублицист, аҭҵаарадырратә усумҭақәа жәпакы равтор, Иа. У. Лакоба апрофессионалтә политик иԥышәа ду иоуит Аԥснытәи АССР Иреиҳаӡоу Асовет Апрезидиум аппарат аҟны жәашықәса инарзынаԥшуа иусурала.
Иакуб Лакоба аԥсуа жәлар рмилаҭ-хақәиҭратә қәԥара акивла иалахәыз дыруаӡәкын. 1992–1993 шш. Аԥсны Аџьынџьтәылатә еибашьраан аус иуан Аџьар Ҟаԥшь Ауаажәларра Ахантәаҩы ихаҭыԥуаҩыс адәныҟатәи аимадарақәеи азини рзы.
Аибашьра ашьҭахьтәи ашықәсқәа раан ҩынтә Аҟәа ақ. Аизара адепутатс далхын. Иакуб Уасил-иԥа илагаламҭа дууп аҿар рааӡара аус аҿгьы. Акыр шықәса аус иухьан Аԥснытәи Аҳәынҭқарратә университет аиуристтә факультет аҟны рҵаҩыс. Уи ааԥсара знымԥшуаз игәамчи изанааҭтә дыррақәеи нхарҭәааны раарԥшра алыршахеит Аԥсны Жәлартә партиа ахантәаҩы имаҵураҟны.

Шықәсырацәала Аԥсны Аҳәынҭқарра ауаажәларра-политикатә ԥсҭазаара иалахәразы Иакуб Уасил-иԥа Лакоба ианашьан Аԥсны Аҳәынҭқарратә ҳамҭа – «Ахьӡ-Аԥша» аорден III аҩаӡара.
Иакуб Уасил-иԥа Лакоба игәалашәара лаша ахааназы ҳгәаҿы инхоит».
.