Ҧхынгәымза 13 рзы Ареспублика Аҩны аҟны имҩаԥысит Аԥсны Аҳәынҭқарреи Башкорҭосҭан Ареспубликеи рыбжьара аизыҟазаашьақәа рыҿиара иазку инарҭбаау аилатәара. Аилатәара иалахәын Аҧсны Ахада Аслан Бжьаниеи Башкорҭосҭан Ахада Ради Хабирови Башкорҭосҭан Ареспублика аиҳабыреи, апарламенти, аминистррақәеи, аусбарҭақәеи рхаҭарнакцәа
Аԥсны Жәлар Реилазара – Апарламент Аиҳабы Лаша Ашәбеи Башкорҭосҭан Ареспублика Курултаи - Аҳәынҭқарратә Еизара ахантәаҩы Константин Толкачиови реиҧылараан апарламентбжьаратә еимадара аҧеиҧш иалацәажәеит.  
Константин Толкачиов асасцәа ирзеиҭеиҳәеит Аҳәынҭқарратә Еизара аусуреи, аилазаареи, азакәанрҿиаратә усуреи ртәы.  
Лаша Ашәба иҳәеит ари аиԥылареи аԥхьаҟатәи аимадарақәеи аҩ-республикак рыбжьара апарламентбжьаратә еимадарақәа рырӷәӷәареи Аԥсны Аҳәынҭқарреи Урыстәылатәи афедерациеи рыбжьара аусеицура аҿиареи ирыцхраауеит ҳәа игәы ишаанаго.