Аԥсны Жәлар Реизара – Апарламент Аиҳабы Лаша Ашәба Геннади Степанов иԥсҭаазара иалҵра инамаданы иуацәеи иҭынхацәеи дрыдышшылеит.
Адышшылара атекст аҟны иҳәоуп
«Аԥсны Жәлар Реизара – Апарламент ахьӡала Геннади Александр-иԥа Степанов иԥсҭаазара иалҵра инамаданы гәалсра дула срыдышшылоит иуацәеи иҭынхацәеи.
Геннади Александр-иԥа Степанов ҳҳәынҭқарразы акыр аџьабаа збахьаз еицырдыруа иуристын. Уи иусура ашықәсқәа зегьы Аԥсны иадҳәалан.
Геннади Александр-иԥа изанааҭтә усура хацыркын Аҟәатәи  афизико-техникатә институт аҟны, уи иацҵан СССР Апрокуратура аилазаареи Аԥсны Аҳәынҭқарра Иреиҳаӡоу аӡбарҭеи рыҟны. Аԥсны Аҳәынҭқарра Иреиҳаӡоу аӡбарҭа Ахантәаҩы Актәи ихаҭыԥуаҩ иаҳасабала иусура хыркәшан аӡбаратә усбарҭақәа рыҟны.  

2005 шықәса инаркны аҵыхәтәантәи амшқәа рҟынӡа Геннади Александр-иԥа Степанов аус иуан Аԥсны Аҳәынҭқарра Апарламент аҟны, азинтәи аналитикатәи ҟәша аиҳабы имаҵураҟны, азинтә зҵаарақәа рзы Аиҳабы иабжьгаҩ хадас. Уи идыррақәеи имаз ахьӡи хархәара рыман иколлегацәа рыҩныҵҟеиԥш, ауаажәларраҟынгьы.
Геннади Александр-иԥа Степанов аус ицызуаз Аԥсны Жәлар Реизара – Апарламент адепутатцәеи аусзуҩцәеи ҳаҭырла изыҟан, игәра ргон. Геннади Александр-иԥа уаҩ бзиан, уаҩы разын, есқьынгьы изанааҭтә дыррақәеи иԥсҭазааратә ԥышәеи рыцеиҩшара дазхиан.
Аԥсны Аҳәынҭқарра азакәанԥҵара аиӷьтәраҟны илагаламҭа ду азы Геннади Александр-иԥа Степанов ианашьоуп Аԥсны Жәлар Реизара – Апарламент Аҳаҭыртә шәҟәы.

Геннади Александр-иԥа иԥсҭазаара иалҵра – цәыӡ дуӡӡоуп иуаҩреи игәбылреи ртәы здыруа зегьы ҳзы.

Иԥсаҭа бзиахааит».