Аԥсны Жәлар Реизара – Апарламент Аиҳабы Лаша Ашәба Аԥсны ауаажәларра азхаҵара Амш рыдиныҳәалеит.

Адныҳәалараҟны иҳәоуп:

«Ҳаҭыр зқәу ҳауаажәлар! Акыр иаԥсоу аҩызцәа!
Ишәыдысныҳәалоит Аԥсны Аҳәынҭқарра ахьыԥшымра жәларбжьаратәи азхаҵара Амш!
Урыстәылатәи Афедерациа зхы иақәиҭу, ихьыԥшым ҳ-Республика азхаҵаразы иаднакылаз азыӡба аԥсуа жәлар, милаҭрацәала еилоу Аԥсны ауаажәларра зегьы, мшын нырцә иҟоу ҳџьынџьуаа рзы, акыр шықәса раахыс аҵак ҷыда змоу амш - 2008 шықәса нанҳәамза 26 арааигәаразы иҳадгылаз зегьы рзы ҭоурыхтә хҭысны иҟалеит
Иҳаҩсыз аамҭа аҩныҵҟала иҳалшаз маҷӡам, иуадаҩыз аҳәынҭқарратә уснагӡатәқәа рыӡбареи, жәларбжьаратәи ҳаимадарақәа рырӷәӷәареи, урҭ рҳәаақәа рырҭбаареи рганахьала. Хымԥада, аԥхьаҟа аҿиаразы алшарақәагьы ҳамоуп.
Ҳара ҳажәлар аамҭақәа зегь раан аусеицуреи агәылеимабзиареи хықәкыс ишрымаз аадырԥшуан. Иҭабуп ҳәа раҳҳәоит урыстәылатәи ажәлар, Урыстәылатәи Афедерациа анапхгара зегьы ҳҳәынҭқарратәра арӷәӷәареи аҭынчра алыршареи рус аҟны рлагаламҭазы. Аԥсны Аҳәынҭқарра ахьыԥшымра иаиуз жәларбжьаратәи азхаҵара ишьақәгылаз аҭагылазаашьа иақәҿнаҭуеит, Кавказ зегьы аҟны аҭышәынтәалара иазҳәоуп.
  Акрызҵазкуа абри амш аҽны гәык-ԥсык ала срыдныҳәаларц сҭахуп ҳара ҳаиԥш, илахьынҵаӡбагоу ари арыцхә - Алада Уаԥстәыла Ареспублика ахьыԥшымра азхаҵара амш азгәазҭо Алада Уаԥстәыла Ареспублика ажәларгьы.
Аԥхьаҟатәи ҳаихьӡарақәа алзыршо акәны иҟоуп ҳажәлар рҟәыӷара, аизҳазыӷьаразы ирымоу агәазыҳәара, ҳакра, ҳаидгылара.
Аԥсны Жәлар Реизара – Апарламент ахьӡала зегьы ишәзеиӷьасшьоит шәнапы злашәкуа аусқәа рыҟны аихьӡарақәа, анасыԥ».