Лугансктәи Жәлартә Республика Жәлар Рхеилак Ахантәаҩы Денис Мирошниченко Аԥсны Жәлар Реизара – Апарламент Аиҳабы Лаша Ашәба Аԥсны Аҳәынҭқарра ахьыԥшымра жәларбжьаратәи азхаҵара Амш идиныҳәалеит.

Адныҳәалараҟны иҳәоуп:

  «Ҳаҭыр зқәу Лаша Нугзар-иԥа! Лугансктәи Жәлартә Республика Жәлар Рхеилак ахьӡала, хаҭала сара сыхьӡала ишәыдысныҳәалоит Аԥсны Аҳәынҭқарра ахьыԥшымра жәларбжьаратәи азхаҵара Амш.
Аԥсны ажәлар ихьыԥшым аҳәынҭқарра аԥҵареи аҿиареи апроцесс аан афырхаҵареи, ахачҳареи аарԥшны иуадаҩыз амҩа ианысит.
Урыстәылатәи Афедерациа Ахада Аԥсны Аҳәынҭқарра азхаҵаразы идикылаз илахьынҵаӡбагоу азыӡба атәыла аполитикатә, аекономикатә, асоциалтә, акультуратә ҿиаразы аҭагылазаашьа ҿыцқәа аԥнаҵеит, уи ала атәылауаа рыԥсҭазаашьа аиӷьтәразы, жәларбжьаратәи аимадарақәа рырӷәӷәаразы алшарагьы шьақәнаргылеит.

Сара агәра згоит аиҩызареи аҳаҭыреиқәҵареи шьаҭас иаҭаны ишьақәгылаз апарламентбжьаратә усеицура аԥхьаҟагьы ҳреспубликақәа ирыбжьоу аизыҟазаашьақәа рыҿиара ишацхраауа.
Акрызҵазкуа абри амш азы Шәаргьы, Аԥсны иқәынхо ажәлар зегьы ирзеиӷьасшьоит агәабзиара, аҭынчра, ахирра, аизҳазыӷьара, уаҵәтәи амш агәрагара».