Иахьа Аҧсны Жәлар Реизара – Апарламент аҟны имҩаԥысит Аԥсны Жәлар Реизара – Апарламент Абиуџьети, акредиттә еиҿкаарақәеи, ашәахтәқәеи, афинансқәеи рзы аилак инарҭбаау аилатәара. Беслан Ҳалуашь имҩаԥигаз аилатәара иалахәын Апарламент адепутатцәа, Аԥыза-министр ихаҭыԥуаҩ, афинансқәа рминистр Владимир Делба, уи ихаҭыԥуаҩ Ирма Амҷба, Аконтрольтә палата ахантәаҩы Роберт Аршба, Аԥсны Ахада Иадминистрациа аҳәынҭқарра-зинтә усбарҭа аиҳабы Наҭела Ломиа.
Аилатәараҟны иахәаԥшын «2022 шықәсазтәи Ареспубликатә биуџьет азы» Аԥсны Аҳәынҭқарра Азакәан аԥсахрақәа ралагаларазы» азакәан апроект. Ари азакәанапроект иахәаԥшны, адепутатцәа азыӡба рыдыркылеит Апарламент ааигәа имҩаԥысраны иҟоу асессиа аилатәара актәи аԥхьараан адкылара абжьгаразы.  
«Аԥсны Аҳәынҭқарра Аконтрольтә палатазы» Аԥсны Аҳәынҭқарра Азакәан инақәыршәаны, аудитор изы иҭацәу амаҵзура ацәырҵра инамаданы, Аԥсны Аҳәынҭқарра Аконтрольтә палата ахантәаҩы Роберт Аршба адепутатцәа рҿаԥхьа иқәиргылеит Инга Витали-иԥҳа Чирикбаиа лкандидатура. Иара убас Аконтрольтә палата аудиторцәа Аԥсны Жәлар Реизара – Апарламент азыӡба ала «Аԥсны Аҳәынҭқарра Аконтрольтә палатазы» Аԥсны Аҳәынҭқарра Азакәан ишьақәнаргылаз аҭагылазаашьақәа раан рхы иақәиҭтәзар злаҟало ала, Роберт Аршба адепутатцәа адырра риҭеит Аконтрольтә палата аудитор Беслан Аркади-иԥа Кәыҵниа Аконтрольтә палата анапхгара ахьӡала арзаҳал шиҩыз ихы иақәиҭтәразы. Аконтрольтә палата Ахантәаҩы адепутатцәа ирыдигалеит акадртә зҵаарақәа рзы ақәшаҳаҭхаразы азыӡба рыдыркыларц. Аилак аилацәажәара аихшьалақәа рыла азыӡба рыдыркылеит арҭ азҵаарақәа рзы Аԥсны Жәлар Реизара – Апарламент  асессиа аилатәараҟны ахәаԥшрахь анагаразы.
Аилак амш азҵаара аҳәаақәа ирҭагӡаны Аилак алацәажәеит Аԥсны Жәлар Реизара – Апарламент ахаҭарнак «2022–2024 шш. Аԥсны Аҳәынҭқарра абиуџьет ԥхьаӡареи аҳасабырбеи рырҿыцразы» бжьаратәла зыԥшра зымуа хықәкылатәи ахылаԥшратә программа аицлабратә комиссиа иалаҵаразы.  
Апрограмма рыдыркылахьан 2022 шықәса ԥхынгәымза 28 рзы Аԥсны Аҳәынҭқарра Аминистрцәа реилазаараҟны. Адепутатцәа азыӡба рыдыркылеит Апарламент ааигәа имҩаԥысраны иҟоу асессиа аилатәараҟны Абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы Беслан Ҳалуашь Аԥсны Жәлар Реизара – Апарламент ахаҭарнак иаҳасабала зыӡбахә ҳәоу хықәкылатәи апрограммазы аицлабратә комиссиахь ишьҭразы икандидатура ақәшаҳаҭхаразы.