Жьҭаарамза 2 рзы официалтә визитла Москва инеит Аԥсны Жәлар Реизара – Апарламент Аиҳабы Лаша Ашәба напхгара ззиуа Аԥсны Жәлар Реизара – Апарламент аделегациа.   .
Шереметиево аҳаиртә баӷәазаҟны аԥснытәи аделегациа даԥылеит УА Федералтә Еизара Аҳәынҭқарратә Дума Ахантәаҩы ихаҭыԥуаҩ Сергеи Неверов.
Аԥсны Жәлар Реизара – Апарламент аделегациа аилазаараҟны иҟоуп: Асҭамыр Аршба -Аԥсны Жәлар Реизара – Апарламент Аиҳабы ихаҭыԥуаҩ; Демур Гогьиа – Аграртә политикеи, аԥсабаратә лшарақәеи, аекологиеи рзы Аԥсны Жәлар Реизара – Апарламент аилак ахантәаҩы ихаҭыԥуаҩ; Инар Гыцба – Аҳәынҭқарра-зинтә политиказы аилак алахәҩы; Вадим Бжьаниа – Аԥсны Жәлар Реизара – Апарламент Аппарат Анапхгаҩы.

Аԥснытәи апарламенттә делегациа алахәҩы Вадим Бжьаниа иажәақәа рыла,  авизит апрограмма инақәыршәаны иазԥхьагәаҭоуп Аԥсны Жәлар Реизара – Апарламент Аиҳабы Лаша Ашәбеи УА Федералтә Еизара Аҳәынҭқарратә Дума Ахантәаҩы Виачеслав Володини, УА Федералтә Еизара  Афедерациа Ахеилак Ахантәаҩы ихаҭыԥуаҩ Константин Косачиови реиԥылара.
Аҳаиртә баӷәазаҟны аиԥылара анаҩс, Аԥсны Жәлар Реизара – Апарламент Аиҳабы Лаша Ашәба иҟаиҵаз ааԥхьарала, УА Афедералтә Еизара Аҳәынҭқарратә Дума Ахантәаҩы ихаҭыԥуаҩ   Сергеи Неверови аԥснытәи аделегациа алахәцәеи Аиааиреи Аԥсны Аҳәынҭқарра Ахьыԥшымреи рымш иазкыз Москватәи аԥсуа диаспора 62-тәи аиԥылара иаҭааит.  
Аԥсны Жәлар Реизара – Апарламент ́аделегациа официалтә визитла Москва иҟазаауеит 2022 шықәса жьҭаарамза 2 инаркны 6-нӡа.