Иахьа  Аҳәынҭқарратә Думаҟны Москва ақ. аҿы аофициалтә визит аан имҩаԥысит Аԥсны Жәлар Реизара – Апарламент Аиҳабы Лаша Ашәбеи УА Федералтә Еизара Аҳәынҭқарратә Дума Ахантәаҩы Виачеслав Володини рофициалтә еиԥылара.

Апарламентқәа рхадацәа аган рацәа змоу аԥсны-урыстәылатәи аизыҟазаашьақәа рырӷәӷәара иадҳәалоу азҵаарақәа жәпакы ирылацәажәеит.
Иазааҭгылеит аус зуа аиқәшаҳаҭра-зинтә база аҿиараҟны апарламенттә еимадарақәа рызҵаарақәа, иара убас асоциалтә-економикатә, АА-еи УА-еи ркультура-гуманитартә усеицура, АА аибашьратә шәарҭадара, акоординациа зызу адәныҟатәи аполитика азҵаарақәа.
   Аиԥылара иалахәыз абжьаратә еихшьала азыруит аԥсны-урыстәылатәи аҳәынҭқарратә ҳәаақәа рахысра азҵаарақәа рыҟны аусеицуразы ааигәа иаԥҵаз аԥсны-урыстәылатәи апарламентбжьаратә усуратә гәыԥ аусура.
Аганқәа ирҳәеит аусеицуразы иаԥҵоу ҩ-ганктәи акомиссиа аҳәаақәа ирҭагӡаны апарламентбжьаратә усеицура арццакра ишазхиоу.
Аԥсуа ган ала аиԥылара иалахәын Аԥсны Жәлар Реизара – Апарламент Аиҳабы ихаҭыԥуаҩ Асҭамыр Аршба, Аграртә политикеи, аԥсабаратә лшарақәеи, аекологиеи рзы Аԥсны Жәлар Реизара – Апарламент аилак ахантәаҩы ихаҭыԥуаҩ Демур Гогьиа, Аҳәынҭқарра-зинтә политиказы аилак алахәҩы Инар Гыцба, Аԥсны Жәлар Реизара – Апарламент Аппарат Анапхгаҩы Вадим Бжьаниа.  УА аҟны иҟоу АА аусқәа рзы аамҭалатәи агәрага Мадина Аҩӡба.
Аҳәынҭқарратә Думаҟны имҩаԥысуаз аиԥылараҿы УА хаҭарнакра азыруан УА Афедералтә Еизара Аҳәынҭқарратә Дума Ахантәаҩы ихаҭыԥуаҩ Сергеи Неверов, ИАР, евразиатәи аинтеграциеи, аџьынџьуаа рымадара аусқәа рзы Аҳәынҭдума Аилак ахантәаҩы Леонид Калашников, атәылахьчаразы Аҳәынҭдума Аилак ахантәаҩы Андреи Картаполов, аџьеи, асоциалтә политикеи, аветеранцәа русқәа рзи Аҳәынҭдума Аилак ахантәаҩы Иарослав Нилов, Аҳәынҭқарратә Дума адепутатцәа иқәдыргыло ахашәалахәқәеи, амазареи, амазаратә ҟазшьа змоу ахыдҵақәеи рзы адыррақәа рҵабыргра аконтроль азура азҵаарақәа рзы, амандаттә зҵаарақәа рзы Аҳәынҭдума Акомиссиа ахантәаҩы Оҭар Аршба, ахантәаҩы Сангаџи Тарбаев, жәларбжьаратәи аусқәа рзы Аилак ахантәаҩы актәи ихаҭыԥуаҩ Алексеи Чепо, Аҳәынҭдума   Аппарат анапхгаҩы ихаҭыԥуаҩ Владимир Попов.
Аԥсны Жәлар Реизара – Апарламент Аиҳабы Лаша Ашәба иазгәеиҭеит ари апарламент VII ааԥхьаразы аҳәаанырцәтәи раԥхьатәи визитны ишыҟоу, насгьы иара УА азы имариам аамҭа ишақәшаз. «Аԥсны жәлар ахақәиҭреи ахьыԥшымреи рыхә бзианы ирдыруеит. Ҳара иҳамоу аԥышәа иҳанаҳәартә иҟоуп иахьа Донбасс имҩаԥысуа закәу, ЛЖӘР-еи ДЖӘР-еи ажәларқәа 8-шықәса изҭагылаз, уи иахылҿиааз, УА апозициа ҵаҵӷәыс иамоу. Ҳара ари апозициа ҳадгылаҩцәоуп», -  иҳәеит иара иаҵшьны.
Апарламент Аиҳабы иажәақәа рыла, ажәларқәа рлахьынҵа аӡбаразы ирымоу азин ԥыжәара амазароуп.
«Цәыббрамза 30 рзы Урыстәыла имҩаԥысуаз ахҭысқәа, – иацы Аҳәынҭқарратә Думаҟны, иахьа Афедерациа Ахеилак аҟны – ДЖӘР-еи ЛЖӘР-еи, Запорожиатәи, Херсонсктәи аобластқәа ирықәынхо ауааԥсыра рзы ҷыдала аҵак ду рымоуп, ари насыԥ зцу аԥсҭазаара, урҭ рыуаажәлар рԥеиԥш иазҳәоуп.
Иахьа Урыстәыла анеонацизм, еилоу Мраҭашәара иаҿагыланы имҩаԥнаго ақәԥара ауаа аӡәырҩы рԥеиԥш ахьчара иазкуп, ари ииашоу, иақәнагоу адунеитә шьақәгылашьа иазкуп, уи зегьы ҳәынҭқаррак анапаҵаҟахь риагара иаҿагылоуп», - ҳәа алкаа ҟаиҵеит Л. Ашәба.
Виачеслав Володин Аԥсны Жәлар Реизара - Апарламент Аиҳабы Лаша Ашәба Аԥсныҟа аҭааразы ииҭаз ааԥхьара идикылеит. Иара убас аиқәшаҳаҭра алыршан хара имгакәа Аԥсны Жәлар Реизара – Апарламенти УА Федералтә Еизара Аҳәынҭқарратә Думеи рыбжьара аиқәшаҳаҭра аҵаҩра азырхиаразы.