Жьҭаарамза 12 рзы имҩаԥысит Аграртә политикеи, аҧсабаратә лшарақәеи, аекологиеи рзы аилак аилатәара

Иахьа имҩаԥысит Аԥсны Жәлар Реизара – Апарламент Аграртә политикеи, аҧсабаратә лшарақәеи, аекологиеи рзы аилак аилатәара.
Аилак аилатәара мҩаԥигеит уи ахантәаҩы Ҭемыр Беиа. Иалахәын Апарламент адепутатцәа, АУ «Аҳәынҭқарратә кадастртә палата» адиректор Ҭемыр Сангәлиа, Адгьылхархәареи акадастри рзы Аҳәынҭқарратә усбарҭақәа аиҳабы Адамыр Аҳәба, уи ихаҭыԥуаҩ Зураб Оҭырба, Аԥсны Ахада Иадминистрациа аҳәынҭқарра-зинтә усбарҭа аиҳабы  Наҭела Ломиа.
Аилатәара амшхәаԥштә инақәыршәаны иахәаԥшын «Агеодезиатәи ахссалаграфикатәи усуреи анаӡааӡаратә обагақәеи рзы» азакәан апроект. Азакәан апроект иҳәаақәнаҵоит Агеодезиатәи ахссалаграфикатәи усура аусхк аҟны аизыҟазаашьақәа, анаӡааӡаратә рбагақәа рыԥшаареи, реизгареи, аус рыдулареи, рыдгалареи, рыларҵәареи надкыланы, урҭ рхыԥхьаӡараҟны иҟоуп аинформациатә системақәа рхархәарагьы. Ари азакәанапроект иахәаԥшны, адепутатцәа азыӡба шьҭырхит Апарламент иабжьыргарц ааигәа имҩаԥысуа аилатәараҟны актәи аԥхьараан ашьақәырӷәӷәара.
Аилак аилатәараан адепутатцәа алацәажәеит ахәаахәҭратә ҩны аргыларазы Гагра араион, Бзыԥҭа аҳ., Ешба имҩаҟны ЗҲӘА «Ахәаахәҭратә ҩны «Рубин» қьырала 25 шықәса ҳәа адгьыл ҭыԥ аҭара; Бабышьира ақыҭа, Ҷанба имҩаҟны 0,06 га зҵазкуа адгьыл ҭыԥ атә. Адлеиба Б.Р. хазхаҭалатәи-анхаратә ргыламҭеи анхарҭа ҩны амаҵуреи рзы иҭаразы,  «ақыҭанхамҩатә ҵакы змоу» акатегориаҟнытә «аиланхарҭатә ҵакы змоу апунктқәа» ркатегориахь аиагаразы Гәылрыԥшь араион Администрациа ажәалагала ақәшаҳаҭхаразы; Гәылрыԥшь ақ. Солнечнаиа амҩаҟны 0,06 га зҵазкуа адгьыл ҭыԥ атә. Кобахьиа Г.А. адача аргыларазы иҭаразы «ақыҭанхамҩатә ҵакы змоу» акатегориаҟнытә «аиланхарҭатә ҵакы змоу апунктқәа» ркатегориахь аиагаразы Гәылрыԥшь араион Администрациа ажәалагала ақәшаҳаҭхаразы;
0,01 га зҵазкуа адгьыл ҭыԥ Гагра араион, Маҳадыр ақ., Апартизантә мҩаҟны аӡеизакырҭа аргыларазы УА ААМ Аҳәаахьчаратә маҵзура УА-еи АА-еи ирыбжьоу Аиқәшаҳаҭра аҿҳәара нҵәаанӡа аҭара;
Кындыӷ ақыҭаҟны 12,0 га адгьыл ҭыԥ «ақыҭанхамҩатә ҵакы змоу» акатегориаҟнытә «аиҭашьақәыргыларатә еиланхарҭатә пунктқәа рыдгьылқәа» ркатегориахь аиагаразы анаҩс иааиԥмырҟьаӡакәа 20,0га адгьыл ҭыԥ зҭакԥхықәра ҳәаақәҵоу ауаажәларра «Жемчужина-2010» агәабзиарачаԥарҭа-курорттә комплекс аргыларазы аҭаразы Очамчыра араион Администрациа ажәалагала ақәшаҳаҭхаразы.
Аилацәажәара аихшьалақәа рыла аилак азыӡба шьҭнахит арҭ азҵаарақәа Аԥсны Жәлар Реизара – Апарламент асессиа аилатәара ахәаԥшрахь анагара. Аилатәараҟны иахәаԥшын 2021 шықәса рашәарамза 9 рзы актәи аԥхьараан ирыдыркылаз «Аԥсны Аҳәынҭқарра ақыҭанхамҩазы» Аԥсны Аҳәынҭқарра азакәан апроект.
Аилак алахәцәа ирыӡбеит ари азакәанапроект аус адулара иацырҵарц.