Аԥсны Жәлар Реизара – Апарламент Аиҳабы Лаша Ашәба Аҧсны усуратә визитла иаҭааз Беларуси Урыстәылеи Реидгыла Апарламенттә Еизара аделегациа даҧылеит.
Беларуси Урыстәылеи Реидгыла Апарламенттә Еизара хаҭарнакра азыруан: Аҿартә политикеи, аспорти, атуризми рзы Апарламенттә Еизара Акомиссиа ахантәаҩы Артиом Туров, Акомиссиа ахантәаҩы ихаҭыҧуаҩ Сергеи Клишевич, апарламенттә Комиссиа алахәцәа Дмитри Басков, Ольга Петрашова, Антон Ткачиов, Беларуси Урыстәылеи Реидгыла Апарламенттә Еизара Аҭакзыҧхықәу амаӡаныҟәгаҩ Сергеи Стрельченко, Аҭакзыҧхықәу амаӡаныҟәгаҩ ихаҭыҧуаҩцәа Вадим Иванеци Дмитри Гоборов, Апарламенттә Еизара Амаӡаныҟәгарҭа аусбарҭақәа реиҳабацәа Дмитри Гриазнови Андреии Шахорскии, иара убас амаӡныҟәгарҭа аусзуҩцәа Виачеслав Русецкии Антон Белокопытови.

Аиҧылара иара убас иалахәын Аԥсны Жәлар Реизара – Апарламент Аиҳабы ихаҭыҧуаҩ Ашот Миносиани Аԥсны Жәлар Реизара – Апарламент Аппарат Анапхгаҩы Вадим Бжьаниа.

Асацәа бзиала шәаабеит ҳәа раҳәо, Апарламент Аиҳабы иаҵшьны иҳәеит Аԥсны Жәлар Реизара – Апарламент аҟны раҧхьаӡакәны ишымҩаҧысуа VII –тәи ааҧхьара адепутатцәеи Урыстәылатәи Афедерациеи Беларус Ареспубликеи рыҟнытә аколлегацәеи злахәу аиҧылара.
«Ари хҭыс бзиоуп. Аиҧылара лыҵшәа аманы ишымҩаҧысуа агәра ганы сыҟоуп. Ҳара ҳрылацәажәараны ҳаҟоуп ҳазегьы ҳзы акрызҵазкуа азҵаарақәа, иара убас ҳпарламенттә еизыҟазаашьақәа ртәы», – иҳәеит Лаша Ашәба.

Аҿартә политикеи, аспорти, атуризми рзы Апарламенттә Еизара Акомиссиа ахантәаҩы Артиом Туров аделегациа алахәцәа рыхьӡала аҧсуа дгьыл аҟны аусеицуразы ироуз алшаразы иҭабуп ахиҳәааит. Уи далацәажәеит напхгара зиҭо Акомиссиа аусура ахырхарҭақәеи аусура азҧхьагәаҭақәеи ртәы, аҧсны Аҳәынҭқарраҟны уи азы иҟоу алшара дуқәа азгәаҭаны.

Акыр шықәса раахыс Аԥсны Жәлар Реизара – Апарламент аус ацызуа Беларуси Урыстәылеи Реидгыла Апарламенттә Еизара Аҭакзыҧхықәу амаӡаныҟәгаҩ Сергеи Стрельченко ишьақәгылаз апарламенттә еизыҟазаашьақәа бзиоуп азиҳәеит, иаҵышьынгьы иҳәеит ааигәа Беларус Ареспублика Ахада Александр Лукашенко Аҧсны Аҳәынҭқарра иаҭаара урҭ аҧхьаҟа рыҿиара ишацхраауа атәы.