Иахьа, ԥхынҷкәынмза 1 азы, Аԥсны Аҳәынҭқарра официалтә визитла иаҭааит УА Афедералтә Еизара Аҳәынҭқарратә Дума Ахантәаҩы Виачеслав Володин напхгара зиҭо аделегациа.

В.Г. Арӡынба ихьӡ зху Аҟәатәи аҳаиртә баӷәазаҟны аделегациа иаԥылеит Аԥсны Жәлар Реизара – Апарламент Аиҳабы Лаша Ашәба, уи ихаҭыԥуаа Фазлыбеи Аҩӡба, Асҭамыр Аршба, Ашот Миносиан, Жәларбжьаратәии апарламентбжьаратәи еимадарақәеи аџьынџьуаа рымадареи рзы аилак ахантәаҩы Беслан Барцыц, Аԥсны Аҳәынҭқарраҟны иҟоу УА Аҷыдалкаатәи Азинмчи змоу Ацҳаражәҳәаҩ Михаил Шургалин.

УА Афедералтә Еизара Аҳәынҭқарратә Дума аделегациа аилазаараҟны иҟоуп:

Аҳәынҭқарратә Дума Ахантәаҩы ихаҭыԥуаҩ Сергеи Неверов, Ихьыԥшым Аҳәынҭқаррақәа Реиҩызара аусқәеи, евразиатәи аинтеграциеи, аџьынџьуаа рымадареи рзы Аҳәынҭқарратә Дума аилак ахантәаҩы Леонид Калашников, Атәылахьчаразы Аҳәынҭқарратә Дума аилак ахантәаҩы Андрей Картаполов, Атуризми атуристтә инфраструктура аҿиареи рзы Аҳәынҭқарратә Дума аилак ахантәаҩы Сангаџьи Тарбаев, Жәларбжьаратәи аусқәа рзы Аҳәынҭқарратә Дума аилак Ахантәаҩы актәи ихаҭыԥуаҩ Светлана Журова, Ихьыԥшым Аҳәынҭқаррақәа Реиҩызара аусқәеи, евразиатәи аинтеграциеи, аџьынџьуаа рымадареи рзы  Аҳәынҭқарратә Дума аилак ахантәаҩы актәи ихаҭыԥуаҩ Константин Затулин.

Аԥсны Аҳәынҭқарра официалтә визитла иаҭааз УА Аҳәынҭқарратә Дума аделегациа  апрограмма аҳәаа инҭагӡаны  имҩаԥысраны иҟоуп Аԥсны Ахада Аслан Бжьаниеи Апарламент Аиҳабы Лаша Ашәбеи Аҳәынҭқарратә Дума Ахантәаҩы Виачеслав Володини реиԥылара. Иазԥхьагәаҭоуп Апарламент депутатцәеи Аҳәынҭқарратә Дума аделегациеи реиԥылара, Аԥсны Жәлар Реизара – Апарламенти УА Афедералтә Еизара Аҳәынҭқарратә Думеи рыбжьара аусеицуразы Аиқәшаҳаҭра аҵаҩра.