Ԥхынҷкәынмза 1 азы Аԥсны Жәлар Реизара – Апарламент аҟны имҩаԥысит  1 Апарламент Аиҳабы Лаша Ашәбеи УА Афедералтә Еизара Аҳәынҭқарратә Дума  Ахантәаҩы Виачеслав Володини реиԥылара.
Урҭ ирҳәеит адепутатцәа рҿаԥхьа иқәгылоу ауснагӡатәқәа рыӡбара иазку русеицура алҵшәа бзиақәа шамоу.

Апарламентқәа рхадацәа алацәажәеит ҩ-ганктәи амш азҵаараҟны иқәгылоу иактуалтәу азҵаарақәа. Урҭ рахьтә ихадараны иалкаан аус зуа аиқәшаҳаҭратә база анагӡара шымҩаԥысуа хылаԥшра аҭара.

Аиԥылара иалахәын: аԥсуа ган аҟнытә – Аԥсны Жәлар Реизара – Апарламент Аиҳабы ихаҭыԥуаа Фазлыбеи Аҩӡба, Асҭамыр Аршба, Ашот Миносиан, урыстәылатәи аган аҟнытә – Аҳәынҭқарратә Дума Ахантәаҩы ихаҭыԥуаҩ Сергеи Неверов, Ихьыԥшым Аҳәынҭқаррақәа Реиҩызара аусқәеи, евразиатәи аинтеграциеи, аџьынџьуаа рымадареи рзы Аҳәынҭқарратә Дума аилак ахантәаҩы Леонид Калашников, Аԥсны Аҳәынҭқарраҟны иҟоу УА Аҷыдалкаатәи Азинмчи змоу Ацҳаражәҳәаҩ Михаил Шургалин.
Аиԥылара мҩаԥысит аиҩызареи аилибакаареи рҟазшьа аманы.