НОВОСТИ

 Аԥсны Жәлар Реизара – Апарламент Аиҳабы Лаша Ашәба Аԥсны жәлар Ашықәс ҿыц рыдиныҳәалеит
31.12.2022
Поделиться в соцсетях:

Аԥсны Жәлар Реизара – Апарламент Аиҳабы Лаша Ашәба Аԥсны жәлар Ашықәс ҿыц рыдиныҳәалеит

  Аԥсны Жәлар Реизара – Апарламент Аиҳабы Лаша Ашәба Аԥсны жәлар Ашықәс ҿыц рыдиныҳәалеит.

«Ҳаҭыр зқәу ҳауаажәлар! Акыр иаԥсоу аҩызцәав!
Аԥсны Жәлар Реизара – Апарламент ахьӡала ишәыдысныҳәалоит ҳазҭало Ашықәс ҿыц!
Ииасуа ашықәс азы дасы шәыԥсҭазаараҟны еиуеиԥшым ахҭысқәа ҟалеит. Урҭ аԥхьаҟатәи аихьӡарақәа ирхыҵхырҭаны иҟалар алшоит. Дасу иԥсҭазаараҟны иҟалаз, ишьақәгылаз, аԥхьаҟа иҟалараны иҟоу азы ихатә зыҟазаашьа имоуп, аха иҟоуп зегьы иаҳзеиԥшу, ҳаидызкыло – ари ҳҳәынҭқарра Аԥсны аргылароуп.
Аԥсны Жәлар Реизара – Апарламент VII ааԥхьара адепутатцәа рзы иҳаҩсуа ашықәс хадара злоу ауснагӡатәқәа разгәаҭара иашықәсны иҟалеит.

Ҳәарада, Аԥсны Аҳәынҭқарраҟны иӡбам апроблемақәа ыҟоуп, урҭ рыӡбара иазаҳкроуп зегьы ҳалшарақәа, ҳтәылауаа рыԥсҭазаашьа аиӷьтәреи ҳҳәынҭқарра ашәараҭадара алыршареи инарымаданы аусура иацҵо.
Акыр иаԥсоу аҩызцәа, ҷыдала ҳрыдныҳәалар ҳҭахуп ашықәсҿыцазтәи амшқәа рзы ззанааҭтә уал анагӡара знапы алаку. Иҭабуп ҳәа раҳҳәоит ҳ-Аԥсадгьыл ахьӡала уахгьы-ҽынгьы аусура иаҿу. Ҳашьҭахьҟа инхааит ҳазҭагылоу аамҭа иацу аԥышәарақәа, иҟалааит шәгәы шьҭызхуа амзызқәа маҷымкәа.

Ҳазҭало ашықәс – Аиааиреи Аԥсны Аҳәынҭқарра Ахьыԥшымреи 30-шықәсеи УА аганахьала Аԥсны Аҳәынҭқарра асуверенитети ахьыԥшымреи жәларбжьаратәи разхаҵареи 15 шықәса рхыҵреи  ирышықәсуп. Ҳгәы иаанагоит арҭ арыцхә дуқәа ишрыхәҭоу ҳарԥылап ҳәа. Ҳара ҳусура зегьы ареспублика аҿиареи жәларбжьаратәи аҩаӡараҟны аҳаҭыр ашьҭыхреи ирызкызароу.

Акыр иаԥсоу аҩызцәа, Ашықәс ҿыц иацны иааиааит абзиарақәа, аҳәоуеиқәшәара, аизҳазыӷьара Аԥсны Аҳәынҭқарра аҭаацәарақәа зегьы рыҟны. Агәабзиара, анасыԥ шәзеиӷьасшьоит 2023 шықәсазы!