Иахьа имҩаԥысит Аԥсны Жәлар Реизара-Апарламент Аҳәынҭқарра-зинтә политиказы аилак инарҭбаау аилатәара. Уи хантәаҩра азиуан Дауҭ Хәытаба.

Аилатәара иалахәын Апарламент Аиҳабы Лаша Ашәба, адепутатцәа, Апарламент аҟны Аԥсны Ахада ихаҭарнак, аиустициа аминистр   Анри Барцыц, аҩныҵҟатәи ауқәа рминистр Вальтер Быҭәба, уи ихаҭыԥуаҩ Беслан Ҷкадуа, Аԥсны Аҳәынҭқарра Апрокурор хада актәи ихаҭыԥуаҩ Дамир Кәыҵниа.

Аилатәара алагамҭазы Лаша Ашәба иҳәеит ареспубликаҟны амҩақәа рҿы амҩа-транспорттә хҭысқәа рхыԥхьаӡареи аԥсыҭбарақәеи реизҳара инамаданы ишьақәгылаз аҭагылазаашьа агәҭынчымра шцәырнаго. Уи иазгәеиҭеит амҩатә ныҟәарақәа рыҟны азинеилагарақәа рзы ахәҭақәыршәареи ари аусхк аҟны аус зуа азакәанԥҵара ақәныҟәара апарламенттә хылаԥшреи рырӷәӷәара дшадгыло. Аилатәара иалахәыз ихы рықәкны, Апарламент Аиҳабы иаҵшьны иҳәеит: «Ауснагӡатәқәа ҳтәылауаа реиқәырхара иацхраауазароуп» ҳәа, убри аҟнытә иколлегацәа азинхьчаратә усбарҭақәа адгылара рыҭара иадиԥхьалеит.

Аилатәара амш азҵаара инақәыршәаны иалацәажәеит «Амҩатә ныҟәарақәа рыҟны административтә зинеилагарақәа рыҟаҵаразы аҭакԥхықәра арӷәӷәара ахәҭаҟны Аԥсны Аҳәынҭқарра азакәанапроектқәак аԥсахрақәа ралагаларазы» азакәан апроект.

Азакәанапроект амҩатә ныҟәарақәа рыԥҟарақәа рзы административтә ҭакԥхықәра арӷәӷәареи административтә зинеилагарақәа рзы Аԥсны Аҳәынҭқарра Азакәанеидкыла анормақәа рыҩныҵҟатәи аиҿагыларақәа раԥыхреи, амҩатә ныҟәарақәа рыҟны административтә зинеилагарақәа рыҟаҵаразы административтә хәҭақәыршәара ақәҵареи анагӡареи рыԥҟара аиӷьтәреи иазкуп.
   Ҷыдала ирызхьаԥшын арыжәтә ыжәны ма даҽакала иашьны иҟоу амашьынаныҟәцаҩ ила атранспорттә хархәага арныҟәара,  уи арныҟәара азин змам ахаҿы иҭара, аԥылара иазку ацәаҳәаҟны амҩатә ныҟәара аԥҟара аилагара азҵаарақәа.
Азакәанапроект аԥшьгаҩцәа ажәалагала ҟарҵеит аус зуа Азакәан ахәҭаҷқәа иҷыдоу автоматтә режим ала аус зуа атехникатә мыругақәа рыла ишьақәыргылоу азинеилагарақәа, ахараԥсатә санкциақәа рырӷәӷәара, атранспорттә хархәагақәа рныҟәгаразы азин амхразы аҿҳәара ацҵара уҳәа, ирыдҳәалоу егьырҭ арҽеирақәа ралагалара.

Акыраамҭатәи аилацәажәара ашьҭахь Аилак алахәцәа азыӡба рыдыркылеит Апарламент изаамҭанытәиу асессиа аилатәараҟны актәи аԥхьараан рыдкылара рабжьгазарц.