Аԥсны Жәлар Реизара – Апарламент адепутатцәа Беслан Ҳалуашь, Дмитри Маршьан, Герман Каҷараа злахәу Аԥсны Аҳәынҭқарра аделегациа ажьырныҳәамза 30 рзы Ҭаҭарсҭан Ареспублика иаҭааит.

Авизит апрограмма аҳәаақәа ирҭагӡаны аԥыза-министр ихаҭыԥуаҩ, аекономика аминистр Кристин Озган напхгара ззылуа аделегациа ахаҭарнакцәа Ҭаҭарсҭан Ареспублика Аекономика аминистрраҟны аиԥыларақәа ирылахәын, иаҭааит Аинвестициатә ҿиара аусбарҭа, ирзыӡырҩит ирыдгалаз Ҭаҭарсҭан аинвестициатә проектқәа.
Иара убас аделегациа аҭааит Ҭаҭарсҭан Ареспублика Аекономика аминистрра иаҵанакуа анаплакра адгылара арегионалтә фонд. Аиԥылараҟны иалацәажәеит аусеицура, адәныҟаекономикатә усура, ареспубликақәа рнаплакқәа рыбжьара аустә еимадарақәа рыбжьаҵара азҵаарақәа.

Аԥснытәи аделегациа аилазаараҟны иҟоуп  – атуризм аминистр Ҭемраз Хышба, ақыҭанхамҩа аминистр ихаҭыԥуаҩ Артуш Сарибекиан, ақалақьқәеи араионқәеи радминистрациақәа рхадацәа:  Беслан Ешба (Аҟәа ақ.), Алхас Ҷыҭанаа (Аҟәа араион), Беслан Бигәаа (Очамчыра араион), Баграт Боџьгәуа (Гәдоуҭа араион), Константин Ԥлиа (Гал араион), Аслан Бараҭелиа (Гәылрыԥшь араион), Ҭемыр Оҭырба (Афон ҿыц ақ.),  Руслан Хәынҵариа (Пицунда ақ.), Гагра  араион администрациа ахада актәи ихаҭыԥуаҩ Адамыр Ҵышәба.

Ҭаҭарсҭан Ареспубликаҟны Аԥсны Аҳәынҭқарра аделегациа аусуратә ныҟәара мҩаԥысуеит жәабранмза 3-нӡа.