Аԥсны Жәлар Реизара – Апарламент Аиҳабы Лаша Ашәба амассатә информациа ахархәагақәа рзанааҭтә ныҳәа рыдиныҳәалеит.

Адныҳәалараҟны иҳәоуп:

  «Ҳаҭыр зқәу амассатә информациа ахархәагақәа русзуҩцәа!

Аԥсны Жәлар Реизара – Апарламент ахьӡала ишәыдысныҳәалоит шәзанааҭтә ныҳәа. Аԥсны Аҳәынҭқарра Амассатә информациа ахархәагақәа русзуҩы имш ишьақәнарӷәӷәоит 1919 шықәса жәабранмза 27 рзы раԥхьатәи аԥсуа газеҭ «Аԥсны» аҭыҵра аҵакы ду. Ахә ашьара уадаҩуп агазеҭ «Аԥсны» аԥсуа журналистика аҭоурых аҟны инанагӡаз ароль.

Ҳаҭыр зқәу ҳколлегацәа, иахьа шәара шәыпрофессионализм, иныҟәыжәго атәылауаҩратә ҭакԥыхқәреи апринципреи ауаа ҳреспубликаҟны имҩаԥсыуаз, уажәы имҩаԥысуа ахҭысқәа ргәынкылара, атәылауаа аԥсадгьыл абзиабара, уи аҭоурых, абызшәа, атрадициақәа рылаӡаара иацхраауеит.

Ҳтәылазы иуадаҩыз аамҭақәа раан шәара агәымшәареи апатриотизми раарԥшра шәылшеит. 1992–1993 шш. Аԥсны Аџьынџьтәылатә еибашьраан АИХ русзуҩцәа рхы иамеигӡакәа аус руан адунеитә уаажәларра рҟынӡа аиашара анагаразы. Ианаамҭоу аинформациа азнагара, ажурналисттә иашара, иаартны ажәлари аиҳабыреи рпозициа аарԥшра иамоу аҵакы дуӡӡоуп ҳҳәынҭқарра аԥсҭазааразы.

Акыр иаԥсоу аҩызцәа, ари аныҳәамш аҽны иҭабуп ҳәа шәаҳҳәарц ҳҭахуп ишәыду аҭакԥхықәра еилкааны, шәзанааҭ иреиӷьу атрадициақәа еиқәырханы иахьаажәго азы.

Ишәзеиӷьаҳшьоит аихьӡарақәа, арҿиаратә гәыхәтәыхьӡара!».