Аԥсны Жәлар Реизара - Апарламент аҟны имҩаԥысит Аекономикатә политикеи, ареформақәеи, аинформациатә технологиқәеи рзы аилаки Абиуџьети, акредиттә еиҿкаарақәеи, ашәахтәқәеи, афинансқәеи рзы аилаки инарҭбаау реилатәара. Уи иалахәын Апарламент Аиҳабы Ашәба Лаша, Аԥсны Жәлар Реизара – Апарламент аҟны Аԥсны Ахада ихаҭарнак аиустициа аминистр Анри Барцыц, аекономика аминистр ихаҭыԥуаҩ Ҭемраз Амқәаб, атуризм аминистр ихаҭыԥуаҩ Асҭамыр Барцыц, Аԥсны агидцәа-аекскурсиамҩаԥгаҩцәа рзанааҭеидгыла ахаҭарнакцәа.  

Аилатәара иалахәыз ахәаԥшит «Аԥсны Аҳәынҭқарраҟны атуристтә усуразы» Аԥсны Аҳәынҭқарра Азакәан аԥсахрақәа ралагаларазы» азакәан апроект. Уи азырхиан аекскурсиамҩаԥгаҩцәа, агидцәа-аиҭагаҩцәа, мамзаргьы атуризм иазку аинструктор иаҳасабала аттестациа ахысразы ахьӡ ақәыргылаҩцәа ирзырхоу аԥҟара хадақәа рышьақәыргылара ахәҭаҟны аус зуа Азакәан аҟны иҟоу агха ариашара хықәкыс иҟаҵаны.

Ирыдгалоу арҽеира инақәыршәаны аекскурсиамҩаԥгаҩцәа, агидцәа-аиҭагаҩцәа, мамзаргьы атуризм иазку аинструктор иаҳасабала аттестациа ахысразы ахьӡ ақәыргылаҩцәаны иҟалар алшоит абжьаратә иҷыдоу (абжьаратә азанааҭтә) мамзаргьы иреиҳаӡоу аҵара змоу рыдагьы, абжьаратә иҷыдоу (абжьаратә азанааҭтә) мамзаргьы иреиҳаӡоу аҵараиурҭақәа рыҟны аҵара зҵогьы. Иара убас аимак ахылҿиааит аттестациа ахысразы ахьӡ ақәыргылаҩцәа рықәра иадҳәалоу атема. Ажәлагалақәа ҟаҵан аекскурсиамҩаԥгаҩцәа, агидцәа-аиҭагаҩцәа, мамзаргьы атуризм иазку аинструкторс иҟалар ауеит ҳәа зықәра наӡаз ахаҿқәагьы.

Адепутатцәа азыӡба рыдыркылеит ари азакәанапроект Аԥсны Жәлар Реизара - Апарламент изаамҭанытәиу асессиа аилатәара амш азҵаара иалаҵаны актәи аԥхьараан адкыларазы.

Аилатәараан иахәаԥшит «Амазаратә комплекс» Аҟәатәи аԥсыӡкратә нхамҩа» Аҟәа ақ. Адлеиба имҩа 19 аҟны иҟоу  априватизациа иаҵанакуа аобиектқәа реиқәыԥхьаӡа алаҵареи априватизациа азуразы аԥҟарақәа рышьақәырӷәӷәареи рзы»  Ақәҵара апроект, азыӡбагьы рыдыркылеит Апарламент ааигәа имҩаԥысуа асессиа аилатәараҟны ашьақәырӷәӷәара рыдгалазааит ҳәа.
  
Инарҭбаау аилатәара мҩаԥигеит Аекономикатә политикеи, ареформақәеи, аинформациатә технологиқәеи рзы аилак ахантәаҩы ихаҭыԥуаҩ Бадрик Ԥлиа.