Аџьынџьтәылатә еибашьра дуӡӡаҟны Аиааира 78 шықәса ахыҵра азгәаҭара аламҭалаз Аԥсны Жәлар Реизара – Апарламент Аиҳабы Ашәба Лаша УА Афедералтә Еизара апалатақәа рнапхгаҩцәа дрыдныҳәалеит.

Афедерациа Ахеилак Ахантәаҩы Валентина Матвиенко илызку адныҳәалараҟны, ҷыдала, иҳәоуп:

  «Ҳара есқьынгьы 1945 шықәсазы афашизм иаҿагыланы ақәԥараҟны Аиааира згаз  асовет жәлар рфырхаҵара ҳазгәдуны иаҳгәалаҳаршәоит.  
Ҳажәларқәа наҟ-ааҟ еидызкыло акәны иҟоуп аибашьцәа-ахьчаҩцәа рфырхаҵаразы иҳамоу агәалашәара, гәыҩбарагьы ҳамаӡам, 1945 шықәсазтәи Аиааира иахьатәи урҭ рышьҭрамдаҩцәагьы анацизм аидеологиа аларҵәара ишаҿагыло.
Ҳхырхәоит Аџьынџьтәылатә еибашьра дуӡӡа аветеранцәа рҿаԥхьа».

Аҳәынҭқарратә Дума Ахантәаҩы Виачеслав Володин дидныҳәало, Ашәба Лаша иазгәеиҭеит:
  
«Аԥсны Аҳәынҭқарра атәылауаа назлоу миллионҩык ауаа рзы Лаҵарамза 9 иԥшьоу ныҳәоуп. Сара агәра згоит ари ас еицакрада ишыҟазаауа!  

Иҭабуп ҳәа раҳҳәоит, агәабзиара, агәам рзеиӷьаҳшьоит Аџьынџьтәылатә еибашьра дуӡӡа  аветеранцәа.
Рыхьӡ кашәара ақәымзааит Аиааира аагара зхы ақәызҵаз, аибашьра ашьҭахьтәи аамҭақәа раангьы абиԥара ҿыцқәа Аԥсадгьыл абзиабаразы аҿырԥшы бзиа рызҭаз».

Аԥсны Жәлар Реизара – Апарламент Аиҳабы Афедерациа Ахеилак алахәцәа, Аҳәынҭқарратә Дума адепутатцәа, Урыстәыла атәылауаа зегьы ирзеиӷьеишьеит аҭынчра, ахирра.

Иара убас Апарламент Аиҳабы Ашәба Лаша Аԥсны Жәлар Реизара – Апарламент ахьӡала адныҳәаларатә шәҟәқәа дәықәиҵеит Аԥсны Аҳәынҭқарраҟны иҟоу УА Аҷыдалкаатәи Азинмчи змоу АцҳаражәҳәаҩМихаил Шургалин, Приднестровиатәи Молдавиатәи Ареспублика Иреиҳаӡоу Асовет Ахантәаҩы Александр Коршунов, Алада Уаԥстәыла Ареспублика Апарламент Ахантәаҩы Алан Алборов,  Арцах Ареспублика Амилаҭтә Еизара Ахантәаҩы Артур Товмасиан, Беларуси Урыстәылеи Реидгыла Апарламенттә Еизара Аҭакзыԥхықәу амаӡаныҟәгаҩ Сергеи Стрельченко, Донецктәи Жәлар Рреспублика Жәлартә Хеилак Ахантәаҩы Владимир Бедиовка, Лугансктәи Жәлар Рреспублика Жәлартә Хеилак Ахантәаҩы Денис Мирошниченко рахь, уб.егь.

.