Азеиԥш иурисдикциа иаҵанакуа Аԥсны Аҳәынҭқарра аӡбарҭақәа аԥҵоижьҭеи 100 шықәса аҵра иазкыз аныҳәатә еилатәараҟны Ашәба Лаша Аԥсны Аҳәынҭқарра аӡбаратә уаажәларра риубилеи рыдиныҳәалеит.

Адныҳәалараҿы иҳәоуп:

«Ҳаҭыр зқәу Саида Рушьни-иԥҳа!

Аԥсны Жәлар Реизара - Апарламент ахьӡала, хаҭала сара сыхьӡала иахьа аус зуеи ԥхьатәара иҟоуи аӡбаҩцәа, Иреиҳаӡоу аӡбарҭа, Аҟәатәи ақалақьтә ӡбарҭа, Гагра, Гәдоуҭа, Аҟәа, Гәылрыԥшь, Очамчыра, Тҟәарчал, Гал араионқәа рыӡбарҭақәеи Арратә ӡбарҭеи раппаратқәа русзуҩцәеи рветеранцәеи ишәыдысныҳәалоит азеиԥш иурисдикциа змоу Аԥсны Аҳәынҭқарра аӡбарҭақәа аԥҵоижьҭеи 100 шықәса аҵра амш! Азеиԥш иурисдикциа змоу Аԥсны Аҳәынҭқарра аӡбарҭақәа шәышықәсатәи риубилеи акрызҵазкуа хҭысуп аӡбаратә уаажәларреи аҳәынҭқарреи рзы.  
1923 шықәса лаҵарамза 13 рзы ССР Аԥсны Ацентртә Анагӡаратә Комитет Ақәҵарала ишьақәырӷәӷәоу Асоветтә Социалисттә Республика Аԥсны аӡбареиҿкааразы Аԥҟара ареспублика аӡбаратә система шьаҭас иауит.
Азеиԥш иурисдикциа змоу Аԥсны Аҳәынҭқарра аӡбарҭақәа рыҿиара ареспубликаҟны ауаажәларра-политикатә ҭагылазаашьа, уи аинститутқәа, аекономика, асоциалтә еизыҟазаашьақәа анырра ду рызҭаз аҭоурыхтә хҭысқәа иузырҟәымҭхо ирыдҳәалоуп.
Азеиԥш иурисдикциа змоу аӡбарҭақәа аҭоурых зегьы аҩныҵҟа имҩаԥыргоит ауаажәларреи аҳәынҭқарреи ринтересқәа ралыршара, азакәан ԥыжәара аҭара, атәылауаа рзинқәеи рхақәиҭрақәеи рыхьчара иазку аусура мҩаԥыргоит.
  Иахьагьы аӡбареиҿкаара аиӷьтәра иазку ауснагӡатәқәа рыӡбоит.
Аԥсны Жәлар Реизара – Апарламент адепутатцәа аҵак ду амоуп ҳәа ирыԥхьаӡоит Азеиԥш иурисдикциа змоу аӡбарҭақәа рколлективқәа аус рыцура, иҭабуп ҳәагьы рарҳәоит ауаажәларра рыҩныҵҟа азинтә культура ашьақәыргалараҟны рлагаламҭазы.
Акыр иаԥсоу аҩзыцәа, ишәзеиӷьасшьоит агәабзиара, агәамч, аизҳазыӷьара,  азинӡбара аинтересқәа рымаҵ аураҟны аихьӡарақәа!»