Иахьа имҩаԥысит Аҳәынҭқарра-зинтә политиказы аилак аилатәара. Аилак ахантәаҩра азиуит Дауҭ Хәытаба. Иахәаԥшит «Административтә зинеилагарақәа рзы Аԥсны Аҳәынҭқарра Азакәанеидкыла аԥсахрақәа ралагаларазы» азакәан апроект. Адепутатцәа азакәан апроект Аԥсны асасцәеи ара иқәынхо ауааԥсыреи иақәнагам ала рҽеилаҳәаны ауаажәларратә ҭыԥқәа рыҟны анеира иақәиҭызымтәуа ахарҭәаарақәа ралагалара рыдыргалеит.

Аилак алахәцәа азыӡба рыдыркылеит Апарламент изаамҭанытәиу аилатәараҟны аҩбатәи аԥхьараан рыдкыларазы ирыдыргыларц.  

Аилак иара убас иахәаԥшит «Аԥсны Аҳәынҭқарра азакәанԥҵаратә актқәак аԥсахарақәа ралагаларазы» азакәан апроект. Аилыркаагатә шәҟәаҟны иҳәоуп азакәанапроект амиграциа аусхк аҟны аконтроли ахылаԥшреи рзы азинмчы змоу, лымкаала «Аԥсны Аҳәынҭқарра алҵреи Аԥсны Аҳәынҭқарра алалареи рзы аԥҟара инақәыршәаны Аԥсны Аҳәынҭқарра атәылауаҩ атәылауашәҟәы иҭаразы» Аԥсны Аҳәынҭқарра Азакәан аҳәынҭқарратә усбарҭа хада афункциақәа оыдҵара аҿҳәара ишацнаҵо 2023 шықәса ԥхынҷкәынмза 31-нӡа.

Ари азакәанапроект ахәаԥшразы адепутатцәа Аԥсны Жәлар Реизара – Апарламент асессиа аилатәарахьы ицәырыргоит.