НОВОСТИ

Аԥсны Жәлар Реизара адепутатцәа Алада-Урыстәылатәи Апарламенттә Ассоциациа XXXVIII Аконференциа иалахәуп
18.05.2023
Поделиться в соцсетях:

Аԥсны Жәлар Реизара адепутатцәа Алада-Урыстәылатәи Апарламенттә Ассоциациа XXXVIII Аконференциа иалахәуп

Иахьа, лаҵарамза 18 рзы, Адыгеиа Ареспубликаҟны аусура иалагеит Алада-Урыстәылатәи Апарламенттә Ассоциациа (АУАА) XXXVIII Аконференциа. Аусмҩаԥгатәқәа хантәаҩра рзиуеит Адыгеиа Ареспублика Аҳәынҭқарратә Хеилак ахантәаҩы Владимир Нарожныи.
Апарламентарии ҩышықәса инареиҳаны еиԥымлацызт – ари аԥхьа иҟаз аконференциақәа хԥа мҩаԥысуан авидеоконференцеимадара арежим ала, убри аҟнытә ари алатәаратә формат аҟны аусмҩаԥгатәқәа жәпакы азԥхьагәаҭоуп.

Аԥсны Жәлар Реизара – Апарламент аделегациа Ашот Миносиани XXXVIII Аконференциахь иааз апарламенттә делегациақәа рнапхгаҩцәеи Адыгеиа Ареспублика Ахада иадминистрациа иаҭааит.
Апарламенттә делегациақәа рнапхгаҩцәа Адыгеиатәи аобком актәи амаӡаныҟәгаҩ, Адыгеиатәи автономтә област ашьақәгылара ахыҵхырҭақәа рыҟны игылаз Шахан-Гиреи Умар-иԥа Хакурат ибаҟеи, Маиҟәаԥ ақалақь Амемориал Хадеи рымҵан ашәҭшьҭаҵара иазкыз аусмҩаԥгатә иалахәын.

  Аконференциа актәи амш аҽны имҩаԥысит апрофилтә еилакқәеи Алада-Урыстәылатәи Апарламенттә акомиссиеи реилатәарақәа.  Асоциалтә политикеи, аџьеи, агәабзиарахьчареи рзы АУАА аилак аусура иалахәын Аԥсны Жәлар Реизара идәықәнаҵаз аделегациа иалахәу Рашида Аибе Алмас Акабеи.
Азакәанԥҵареи, аҳәынҭқарратә ргылареи, аҭыԥантәи ахаланапхгареи рзы АУАА аилак иалахәу арҭ адепутатцәа азакәанԥҵаратә аԥшьгарақәа рыхәаԥшра иалахәын.  АА Апарламент ахаҭарнак амилаҭбжьаратә еизыҟазаашьақәа, апарламентбжьаратә еимадарақәа, абаҩрҵәыреи, аспорти, атуризми, аҿар русқәеи рзы АУАА аилак аилатәара далахәын Венори Бебиа.

Аԥсны Жәлар Реизара адепутцәа рахьтә АУАА аусураҟны еиҳа аԥышәа имоуп Левон Галустиан.   V, VI, VII ааԥхьарақәа дырдепутатны дызлаҟоу ала, уи АУАА аилак Аԥсны Апарламент ахаҭаранак иаҳасабала хынтәуп далахәуижьҭеи. Уажәы Л. Галустиан аҵареи, аҭҵаарадырреи, акультуреи, аинформациатә политикеи рзы АУАА аилак далахәуп.

Аконференциа аҳәаақәа ирҭагӡаны раԥхьаӡакәны имҩаԥысит аруаа рсоциалтә адапҭациеи, аветеранцәа русқәеи рпатриоттә ааӡареи рызҵаарақәа рзы АУАА иҷыдоу акомиссиа аилатәара. Аилак аԥҵан ари аԥхьа имҩаԥысыз АУАА XXXVII Аконференциа аихшьалақәа рыла. Аԥсны Апарламент аҟнытә ари аилак аусура далахәын  Беслан Емырхәба.

Апарламенттә делегациа иалахәны Адыгеиа инеиз адепутатцәа Ҭемыр Беиа, Баҭал Џьопуа, Асҭамыр Герхьелиа АУАА абарҭ аилакқәа реилатәарақәа ирылахәын: аграртә зҵаарақәеи адгьылхархәареи рзы; аекономикатә политикеи, ааглыхреи, адәныҟаекономикатә еимадарақәеи рзы; аргылареи анхарҭа-коммуналтә нхамҩеи, афымцамчи, атранспорти, аимадареи рзы.

Аилакқәа реилатәараҟны ишьҭыхын агәабзиарахьчареи аҵареи рсистема аиӷьтәра иазкыз азакәанԥҵаратә жәалагалақәа, административтә закәанԥҵара, абиуџьеттәи ашәахтәтәи политика, АКН аусхк, аекологиатә шәарҭадара уҳәа егьырҭ азҵаарақәагьы. АУАА аилакқәа рзыӡбақәа АУАА Ахеилак ахь идәықәҵан ХХXVIII Аконференциа апленартә еилатәара амш азҵаара апроект алаҵаразы.

Иахьа имҩаԥысыз АУАА Ахеилак (уи иалахәуп аделегациақәа зегьы рнапхгаҩцәа) аилатәара мҩаԥигеит Владимир Нарожныи – АУАА Ахантәаҩы, Адыгеиа Ареспублика Аҳәынҭқарратә Хеилак ахантәаҩы.  
АУАА Ахеилак аилатәараҟны аделегациақәа рнапхгаҩцәа апарламенттә усуразы ргәаанагарақәа еибырҳәеит, азыӡба рыдыркылеит Алада-Урыстәылатәи Апарламенттә Ассоциациа  аҳаҭыртә ҳамҭа анашьареи Алада-Урыстәылатәи Апарламенттә Ассоциациа XXXIX Аконференциа амҩаԥгарҭа аҭыԥи рзы.
Аконференциа апрограмма инақәыршәаны имҩаԥысит Адыгеиа Ареспублика Аҳәынҭқарратә Хеилак – Хасеи Ставропольтәи атәылаҿацә Адумеи, Севастополь ақалақь Азакәанԥҵаратә Еизареи, Астрахантәи аобласт Адумеи рыбжьара апарламентбжьаратә усеицуразы аиқәшаҳаҭрақәа рыҵаҩра.

Иазгәаҭатәуп, Аԥсны Жәлар Реизара – Апарламенти Адыгеиа Ареспублика Аҳәынҭқарратә Хеилак – Хасеи рыбжьара апарламентбжьаратә усеицуразы Аиқәшаҳаҭра ишаҵаҩыз 1997 ш. цәыббрамза 26 рзы.