Иахьа Алада-Урыстәылатәи Апарламенттә Ассоциациа (АУАА) XXXVIII Аконференциа аусмҩаԥгатәқәа ирылахәыз апарламенттә делегациа напхгара азҭоз Аԥсны Жәлар Реизара – Апарламент Аиҳабы ихаҭыԥуаҩ Ашот Миносиан Аԥсны Жәлар Реизара – Апарламент Аиҳабы Ашәба Лаша инапы иаиркит агәаларшәагатә дырга «Сталинградтәи аибашьра 80 шықәса ахыҵра».
Агәаларшәагатә дырга Ашәба Лаша ииҭеит Алада-Урыстәылатәи Апарламенттә Ассоциациа Ахеилак аилатәараҟны апарламенттә делегациақәа рнапхгаҩцәа реиԥылараан Волгоградтәи аобласт Адума ахантәаҩы Александр Блошкин иҟаиҵаз аҳәарала.

Иара убас Ашот Миносиан Ашәба Лаша Мураҭ Кумпилов ихьӡала инапы иаиркит Адыгеиа Ареспублика Ахада аиубилеитә медаль «Адыгеиа Ареспублика ашьақәгылара 100 шықәса ахыҵра».
Аиубилеитә медаль «Адыгеиа Ареспублика ашьақәгылара 100 шықәса ахыҵра» аԥҵан Адыгеиа Ареспублика шьақәгылеижьҭеи 100 аҵра иазкны 2022 шықәса жәабранмза 16 аҟнытә Адыгеиа Ареспублика Ахада М. Кумпилов Иусԥҟала.